Səhiyyə nazirinin müavini Elsevər Ağayev psixotrop dərman preparatlarının dövriyyəsinə nəzarət olunduğunu deyib.
Onun sözlərinə görə, bu yaxınlarda Səhiyyə Nazirliyi tərəfindən 50 milliqramlıq "travmadol” dərman preparatının siyahıya daxil edilməsi aşkarlanıb.
Nazir müavini qeyd edib ki, apteklər bəzi dərmanların satışını həyata keçirərkən diqqətli olmalıdırlar.
Maraqlıdır, apteklərə nəzarət edilməsi bu sahədə olan neqativ halların aradan qalxmasına şərait yaradacaq?
Apteklərdə dərman satışları ilə bağlı konkret qaydalara ehtiyac olduğunu deyən tibb elmləri doktoru, professor Adil Qeybullanın sözlərinə görə, həkim resepti olmadan dərman preparatlarının satışı qadağan olunmalıdır.
Professor bildirib ki, yalnız qeyri-steroit analgetiklər, məsələn, "parastamol” kimi dərmanların açıq şəkildə satışı həyata keçirilə bilər:
"Qalan dərmanlar isə həkim resepti əsasında satılmalıdır. Bizdə isə istənilən dərmanı gedib aptekdən almaq olur. Belə olan halda da aptek işçiləri dərmanı daha çox satmaqda maraqlıdırlar. Narkomanlar üçün metodom proqramı var. Metodom özü də bir narkotikdir, amma ona alışma yaranmır. Narkoman gedib onu aptekdən alır və heç bir problem olmadan istifadə edir. Bizdə isə bunlar kriminal yolla əldə olunur və bu da cinayət tərkibi yaradır. Apteklərdə qayda-qanun yaratmaq üçün yol ondan ibarətdir ki, həkim resepti olmadan xəstəyə dərman satışı qadağan olunmalıdır. Söhbət təkcə psixotrop dərmanlardan getmir.
Xəstə kiminsə göstərişi ilə gedib özünün qan təzyiqini aşağı endirən və şəkər əleyhinə olan dərman alır. Bütün bunlar qeyri-qanuni məsələlərdir. İnsanlara bu sahədə vərdiş elətdirmək lazımdır. Xüsusilə nəzərə alsaq ki, ölkəmizdə icbari tibbi sığorta gözlənilir və bu sığorta olandan sonra ümumiyyətlə dərmanların buraxılışı məsələsi tamamilə ciddi şəkil almalıdır. Dərman bazarındakı bu xoşagəlməz vəziyyəti qaydaya salmaq lazımdır. Resept olmadan qadağan edilən dərmanların ələ keçməsi və onlardan sui-istifadə halları dərmanların dövriyyəsinə ciddi nəzarətin olmadığından qaynaqlanır”.
Yeganə Bayramova
