Rusiyanın maliyyəsi ilə salınan qəsəbələrə erməni qaçqın ailələri köçürülür
“Rusiya sülhməramlıları Xocalı, Əsgəran və Şuşa ətrafında yeni qəsəbələr salırlar”.
Bu sözləri “Şərq”ə açıqlamasında politoloq Məhəmməd Əsədullazadə deyib. Siyasi şərhçi bildirib ki, birbaşa Rusiyanın maliyyə hesabına salınan qəsəbələrdə Ermənistandan qaçqın ailələr köçürülür:
“Onları qəsəbə ətrafında yeni iş yerləri ilə təmin edirlər. Maaşlar və əlavə ödənişləri də Rusiya tərəfi həyata keçirir. İşi görən Rusiya Fövqəladə Hallar Nazirliyidir. Bu nazirliyin Xankəndidə, Xocalıda nümayəndəlikləri var. Rusiya FHN hər bir ailəyə əlavə ödənişlər vəd edir”.
Analitik hesab edir ki, Azərbaycan tərəfi Rusiyadan bununla bağlı izahat tələb etməlidir:
“Yeni tikilən şəhərciklərdə mini sex və zavodlar tikilir, iş yerləri yaradılır. Məhsulların birbaşa Ermənistan və Rusiya bazarlarına çıxışı da təmin edilir. Moskva hər vəchlə çalışır ki, ermənilərin Qarabağdan köçməsinin qarşısını alsın”.
