Bakı Beynəlxalq Avtovağzal Kompleksi sərnişinlərin cibinə girmək üçün növbəti hiyləyə əl atıb. Əvvəllər gecə saatlarına – 12:30-a qədər- fəaliyyət göstərən "Bakı-Qırmızı Körpü” reysinin son yola düşmə tarixi dəyişdirilib. Bir müddətdir ki, sözügedən avtobusların son yola düşmə tarixi 17:30-a endirilib.
Xatırladaq ki, Bakı- Qazax avtobusunun da son yola düşmə tarixi 17:30-dur. Bu isə o deməkdir ki, gecə saatlarında Qazax və ya Gürcüstana yola düşmək istəyən sərnişinlər mütləq ya Bakı-Tbilisi, ya da Bakı-Marneuli reysindən istifadə etməlidirlər. Belə olan halda da həmin sərnişinlər əvvəlki ilə müqayisədə daha çox yol pulu ödəməli olurlar. Çünki Bakı-Qazax avtobslarına biletlər 10.90, "Bakı-Qırmızı Körpü” 11.90, Bakı-Marneuli 14, Bakı -Tbilisiyə isə 15 manata satılır. Əlbəttə, bu da bir növ sərnişinlərin cibinə girmək cəhdidir.
Məsələ ilə bağlı "Sherg.az”a danışan iqtisadçı-ekspert Natiq Cəfərli avtovağzalda biletlərin qiymətinin dövlət tərəfindən tənzimlənmədiyini deyib.
Ekspert bildirib ki, qiymətlər nə Tarif Şurası, nə də digər dövlət orqanları tərəfindən müəyyən olunur:
"Avtovağzalda özəl sektorun iştirakı ilə reyslər tənzimlənir. Həmin sektorlar işin təşkili üçün fiziki şəxslərdən müəyyən rüsum əldə edirlər. Araşdırmaq lazımdır ki, avtovağzalda qaynaqlanan ödənişlərdə artım var yoxsa yox? Əgər belə bir artım yoxdursa, o zaman avtovağzal rəhbərliyi həmin marşutlar üzrə işləmək istəyən digər özəl şirkətləri və fərqli sahibkarları cəlb etməklə rəqabət mühitini artıra bilər ki, qiymətlər yüksəlməsin.
Yəni, iş adamlarına və yaxud fiziki və hüquqi şəxslərə qiymətlərin azaldılmasını demək düzgün yanaşma deyil. Bazar iqtisadiyyatı qaydaları işləməlidir. Bu qaydalara görə, isə rəqabətli mühit olmalıdır. Əgər avtovağzal rəhbərliyi bununla bağlı hər hansı bir addım atmaq istəyirsə, ödənişlərdə düzəliş edə bilər.
Rəhbərlik həmçinin qiymətin aşağı düşməsini iş adamları ilə danışaraq deyə bilər ki, göstərdiyim xidmətləri azaldıram, siz də bilet qiymətlərini azaldın ki, vətəndaşa ziyan dəyməsin. Belə bir yanaşma mümkündür. Amma hansısa formada qiymətlərin tənzimlənməsi və yaxud diktə olunması bazar iqtisadiyyatı qaydalarına görə mümkün deyil”.
Yeganə Bayramova
