"Kommersiya bankları maliyyə bazarında sadəcə vasitəçidir. Yəni bir qayda olaraq, onlar öz pullarını kredit vermirlər”.
Bu sözləri "Sherg.az”a bankların əhaliyə yüksək faizlərlə kredit verməsinin səbəblərini izah edərkən bank məsələləri üzrə ekspert Əkrəm Həsənov söyləyib.
Ekspert diqqətə çatdırıb ki, bu, kommersiya banklarının Mərkəzi Bankdan (MB) götürdükləri kredit və sahibkarların əmanətləridir:
"Ötən ilin ortalarından MB-ın uçot dərəcəsi 15 faizdir. MB kommersiya banklarına bu faizlə kredit verir. Ona görə, banklar da üzərinə daha çox faiz qoyur. Bu məsələdə əsas günahkar Mərkəzi Bankdır. Baş bank o faiz dərəcəsini endirməlidir ki, banklar da əhaliyə ucuz kredit verə bilsin.
Burada bankların öz günahı da var. 15 faizlə götürülən krediti banklar heç olmasa 20-22 faizlə əhaliyə verə bilərlər. Lakin faizlər bundan çoxdur.
Bu, sahibkarlar üçün ciddi problem yaradır. Onlar bu qədər yüksək faizlə krediti götürə bilmirlər. Sahibkarlar kredit götürə bilmədiyi müddətdə isə iqtisadiyyatımızda problem davam edəcək, işsizlik artacaq.
Ötən illərin təcrübəsi göstərir ki, banklar öz yaxınlarına, əlaqəli şirkətlərinə ucuz kreditlər verirlər. Hətta bəzən MB-dan aldıqları faizdən ucuz və ya faizsiz kreditlər verilir.
Arada yaranan fərq isə sadə vətəndaşların, aşağı gəlirləri olan sahibkarların hesabına bağlanır. Bütün bunlar bank sistemində olan qeyri-sağlam münasibətlərdən irəli gəlir”.
Aysel Aslan
