Azərbaycanın dövlət bayrağı, dövlət himni və dövlət gerbi ilə bağlı Konstitusiya qanunlarına dəyişiklik müzakirəyə çıxarılacaq.
Bununla bağlı məsələlər Milli Məclisin 2017-ci il payız sessiyasının qanunvericilik işlər planına daxil edilib.
İşlər planında "Azərbaycan Respublikasının Dövlət bayrağı haqqında”, "Azərbaycan Respublikasının Dövlət gerbi haqqında” və "Azərbaycan Respublikasının Dövlət himni haqqında” qanun layihələrinə əlavə və dəyişikliklərin müzakirəsi yer alıb. Layihələrin məzmunu hələlik açıqlanmayıb.
İşlər planı MM-in payız sessiyasının oktyabrın 2-də keçiriləcək ilk plenar iclasında müzakirəyə çıxarılacaq.
Millət vəkili Tahir Kərimli də "Şərq”ə açıqlamasında sözügedən qanun layihəsi ilə bağlı məlumatsız olduğunu, hətta belə bir müzakirənin keçiriləcəyinin inandırıcı olmadığını deyib:
"Ehtimal etmirəm ona görə ki, bu məsələ Milli Məclisdə ciddi şəkildə qaldırılmayıb. Ola bilsin ki, ayrı-ayrı millət vəkilləri tərəfindən bu məsələ təklif olaraq irəli sürülsün. Amma komitə iclaslarında bu məsələnin müzakirə predmeti olduğuna şahid olmamışam”.
Azərbaycanın dövlət bayrağı, dövlət himni və dövlət gerbi ilə bağlı Konstitusiya qanunlarına əsaslı dəyişikliklər edilməsini məqsədəuyğun saymayan millət vəkili hesab edir ki, himnimizin musiqisi yarımnotlar şəklində gücləndirilə, gerbə isə təsviri dəyişikliklər edilə bilər:
"Bunlar isə əvvəlcədən yaradıcılıq tələb etdiyi üçün hazır formada Milli Məclisə təqdim olunmalıdır ki, deputatlar tərəfindən baxış keçirilsin. Himn, gerb və bayraq dövlət atributlarımızdır və bu simvollar yüzillik dövlətçilik tariximizi özündə əks etdir. Fundamental dəyişikliklərin birmənalı olaraq əleyhinəyəm”.
Şəymən
