AKP-nin İzmirdən olan millət vəkili və parlamentli respublika idarəetmə üsulunda sonuncu baş nazir olmuş Binəli Yıldırım Türkiyə Böyük Millət Məclisinin (TBMM) yeni sədri seçilib.
584 millət vəkilinin iştirak etdiyi səsvermədə Yıldırım 335 səs toplayaraq bu vəzifəni tutub. TBMM-nin 28-ci spikeri olan B.Yıldırımın bu posta seçilməsini yüksək dəyərləndirən politoloq Natiq Miri onun 15 iyul dövlət çevrilişinə cəhddən sonra sonuncu baş nazir postunu tutan bir şəxs olaraq birləşdirici missiyanı uğurla başa vurduğunu deyib: " Hətta Yıldırım üçün 15 iyul hadisələrini böyük imtahan kimi də dəyərləndirmək olar. Baş nazir olan Binəli Yıldırım çevriliş zamanı dövləti tərk etmədən çevrilişə cəhd edən insanların qarşısına çıxdı. Bundan əlavə də dirənişi idarə edənlərdən biri idi. Bu isə Türkiyə toplumunun və AKP siyasi hakimiyyətinin lideri Ərdoğanın diqqətindən qaçmadı. Türkiyə Prezidenti Ərdoğanın Binəli Yıldırımı "Şərəf” ordeni ilə təltif etməsi Türkiyə tarixində Atatürkdən sonra ikinci hadisə idi. Düşünürəm ki, bu, qardaş ölkə üçün tarixi bir hadisədir. Yıldırım bir şəxsiyyət olaraq AKP-MHP ittifaqının siyasi davamçısı, həm də toplumda birləşdirici siyasi fiqur olduğunu təsdiq edib. Belə bir siyasətçinin bütün Türkiyənin siyasi iradəsini nümayiş etdirən parlamentə başçılıq etməsi ölkə adına doğru və əhəmiyyətli bir seçimdir. TBMM hər zaman əhəmiyyətli bir siyasi mərkəz kimi öz rolunu qoruyub saxlayıb. Atatürkdən bu yana Türkiyənin qorunub saxlanılmasında əvəzsiz xidməti olan qazilər məkanının Türkiyəni sevən və islam ümmətinin bütün meyarlarını özündə daşıyan bir şəxsə tapşırılması doğru bir qərardır. Bu cür əhəmiyyətli bir orqanın başına sonuncu baş nazir Binəli Yıldırım kimi bir şəxsiyyətin gətirilməsi türk toplumunun inkişafına və birliyinə xidmət edəcək”.
Şəymən
