Milli Məclisin payız sessiyasının başlanma vaxtı məlum olub. Oktyabrın 2-də sessiyanın ilk plenar iclası keçiriləcək.
İclasın gündəliyində müzakirə olunacaq məsələlər və sessiyadakı gözləntilərlə bağlı millət vəkili Zahid Oruc "Şərq”ə danışıb. Deputat parlamentin hər zaman dövlət quruculuğunda aktiv bir şəkildə iştirak etdiyini diqqətə çatdırıb.
Onun sözlərinə görə, 2017-ci ilin siyasi və iqtisadi gündəliyi kifayət qədər zəngindir. Ölkəmiz bir tərəfdən mühüm beynəlxalq əlaqələrin və əməkdaşlığın içərisindədir: "Həmçinin təhlükəsizlik problemləri də çoxdur. Azərbaycan mühüm müqavilələr və sənədlər imzalamaqdadır və bütün bunların hamısında parlamentin iştirakı tələb olunacaq. Məsələn, sentyabrın 14-də yüksək bir səviyyədə reallaşmış yeni əsrin neft müqaviləsi qanunverici orqan tərəfindən ratifikasiya olunmalıdır və yalnız bundan sonra müqavilə yüksək hüquqi məna daşıyacaq. Eyni zamanda ölkəmizdə istər dövlət idarəetmə sistemində, istərsə də maliyyə sektorunda, iqtisadi sahələrdə çox böyük işlər tələb olunur. Bunlar demək olar ki, ölkə başçısının siyasi fəaliyyətinin hər gün əsasını təşkil edir”.
Z.Oruc həmçinin qanunvericilik sistemində böyük dəyişikliklərin gözlənildiyini bildirib:
"Hətta mən bunları tarixi yeniliklər hesab edirəm. Bu, bütövlükdə hüquq təfəkkürünü və sistemini, vətəndaş-dövlət münasibətlərini dəyişəcək hadisələrdir. Cinayət qanunvericiliyində dekriminallaşma ilə bağlı artıq layihə təqdim olunub və sessiyanın gündəliyinə salınıb. Düşünürəm ki, bu çox qısa bir müddətdə aparılacaq, yaxşı müzakirələr vasitəsilə qanunvericilik sisteminin tərkibinə çevriləcək və avtomatik olaraq on minlərlə insanın həyatını əhatə edəcək. Biz başa düşməliyik ki, qanunvericilik sistemində humanistləşmə cəmiyyətdə də avtomatik olaraq humanistliyi gücləndirəcək. Bu nöqteyi-nəzərdən müzakirə olunacaq çoxlu məsələlər var. Hər bir parlament üzvünün hüququ var ki, birinci islahatda gündəliyə müxtəlif təşəbbüslərlə çıxış eləsin.
Qanun yaradıcılığı ilə bağlı, eləcə də müxtəlif siyasi təkliflərimizin səslənməsi mümkündür. Mən təxminən 6-7 məsələ üzərində öz mövqeyimi birinci iclasda təqdim edəcəm. Hesab edirəm ki, parlamentin aktiv bir formada fəaliyyət aparmasına ciddi ehtiyac var. Onsuz da dövlətin yürütdüyü siyasətin hər zaman episentrində Milli Məclis olub. Millət vəkilləri bunu başa düşür və qarşıdakı zamanlarda istər regional, beynəlxalq, istərsə də ölkədaxili məsələlər mühüm bir hakimiyyət qolu kimi parlamentin aktiv platformada fəaliyyət göstərməsini bizdən tələb edəcək”.
Yeganə Bayramova
