"Azərbaycan Respublikasının Konstitusiyasına əsasən konstitusiya və referendumla qəbul edilən aktlar istisna olmaqla beynəlxalq hüququn bütün Azərbaycan qanunlarından üstünlüyü təmin edilir”.
Bu barədə "Sherg.az”a Azərbaycanda Avropa məhkəməsi qərarlarının icrasının dayandırılması ilə bağlı danışarkən millət vəkili Tahir Kərimli bildirib.
O qeyd ki, qanunun qəbulunda indiyə qədər bir sıra hallar baş verdiyindən qanun dəyişdirilməsi gündəmə gəldi:
"Bundan əvvəl Rusiya hökuməti tərəfindən də oxşar addım atıldı. Dəyişikliklərdə qeyd edilirdi ki, əgər beynəlxalq məhkəmələrin, təşkilatların qərarları Rusiya qanunvericiliyi ilə ziddiyyət təşkil edirsə, hökumətin qərarların icrasını ləğv etmək ixtiyarı var. Həmin analogiya Azərbaycanda da insan haqları məhkəmələrinin və digər instansiyalarının qərarlarının ölkəmizdə tətbiqi ilə bağlı təklif edilir. Beynəlxalq instansiyalar tərəfindən dəfələrlə bu məsələdən istifadə edərək təzyiqlər göstərilib. Ona görə, bu cür qanunun qəbul edilməsi zəruridir.
Hesab edirəm ki, belə qanun qəbul olunacaqsa, yalnız insan haqları ilə bağlı məhkəmə qərarlarına aid edilməməlidir. Bütün beynəlxalq məhkəmələrin qərarlarına ehtiva olunsun. Həmçinin ola bilər, bizi Ermənistanla bağlı haqsız məhkəmə qərarının icrasına məcbur etsinlər. Bu baxımdan qeyd edilən dəyişikliyin bütün beynəlxalq qərarlara aid edilməsi zəruridir.
Hələlik bu məsələ müzakirə olunur. Dövlətin bu məsələdə haqlı tərəfləri odur ki, beynəlxalq instansiyaların qərarlarından əziyyət çəkirlər, hökumətə və dövlətə qarşı ciddi təzyiqlər olur. Digər tərəfdən Azərbaycanın qəbul etdiyi öhdəliklərə əsasən beynəlxalq qərarların icrası məcburiliyi var”.
T. Kərimli bu qərarın qəbulundan sonra Avropanın Azərbaycana qarşı təzyiqlərinin artacağına da toxunub. O diqqətə çatdırıb ki, Azərbaycan tərəfi milli qanunvericiliyə görə ittiham oluna bilməz:
"Çünki milli qanunvericilik üstün mövqeyə keçir. Ancaq indiki vəziyyətdə Azərbaycan beynəlxalq təşkilatlar qarşısında öhdəliklər qəbul edib və beynəlxalq qanunların üstünlüyünü vurğulayıb. İndiki şəraitdə beynəlxalq təşkilatlar buna əsaslanıb hüquqi baxımdan təzyiqlər edir. Gələcəkdə ola bilər, siyasi ittihamlar artsın, Azərbaycan qanunvericiliyinin beynəlxalq qanunvericiliyə uyğun olmaması haqqında bəyanatlar səsləndirilsin. Buna rəğmən, Azərbaycan tərəfini məcburedici qərarlarla təhdid edə bilməyəcəklər”.
Qeyd edək ki, iki ildir, müzakirəsi təxirə düşən dövlətarası orqanın qərarının Azərbaycan tərəfindən icrasının mümkün olub-olmamasına qərar vermə ilə bağlı hüququ nəzərdə tutan qanun layihəsi bu ilin yaz sessiyasında Milli Məclisdə (MM) müzakirəyə çıxarılacaq.
"İnsan hüquq və azadlıqlarının müdafiəsi üzrə dövlətlərarası orqanın qərarının Azərbaycan Respublikası tərəfindən icrasının mümkünlüyü məsələsinin həlli haqqında” Konstitusiya qanunu layihəsi MM-in 2018-ci il yaz sessiyasında işlər planına daxil edilir.
Aysel Aslan
