İşğalçı Ermənistan dini məbədlərimizi, məscidlərimizi, mədəni-tarixi abidələrimizi dağıdıb
"Nəzərə almaq lazımdır ki, Ermənistan destruktiv siyasət yürüdən, qonşu dövlətlərə ərazi iddiaları irəli sürən işğalçı bir dövlətdir”. Bunu İran Prezidenti Həsən Ruhaninin Ermənistana səfəri ilə əlaqədar açıqlama verən Xarici İşlər Nazirliyinin mətbuat xidmətinin rəhbəri Hikmət Hacıyev deyib.
Nazirlik rəsmisi bildirib ki, Azərbaycan-İran münasibətlərinin təməl prinsiplərindən biri ölkələrin daxili işlərinə qarışmamaqdır. Lakin rəsmi Tehran bilməmiş deyil ki, Ermənistanın Azərbaycanın işğal edilmiş ərazilərində törətdiyi qanlı etnik təmizləmə siyasəti nəticəsində bir milyondan artıq azərbaycanlı qaçqın və məcburi köçkün vəziyyətində yaşayır: "Ermənistan işğal olunmuş ərazilərdə Azərbaycan xalqına məxsus maddi-mədəniyyət abidələrini, o cümlədən islam dininə aid ibadət ocaqlarını, məscidləri talan və məhv edib, təhqir obyektinə çevirib”. Məlumat üçün bildirək ki, dünən İran rəhbəri Ruhani düşmən Ermənistana səfər edib. Ruhani işğalçı ölkə başçısı tərəfindən çox mehribanlıqla qarşılanıb. İran Prezidentinin təcavüzkar Ermənistana səfərinə Azərbaycan ictimaiyyəti çox sərt reaksiya verib və etirazını bildirib.
Reallaşan səfərlə bağlı "Şərq”ə danışan millət vəkili, siyasi elmlər doktoru Elman Nəsirov deyib ki, bu ziyarətin Azərbaycan cəmiyyətində haqlı narazılıq doğurması anlaşılan və məntiqlidir. Çünki Ruhani normal və sağlam bir ölkəyə səfər etmir:
"İran rəhbərinin getdiyi ölkə Azərbaycan ərazilərinin 20 faizini işğal altında saxlayan düşmən dövlətdir. Ruhaninin səfər etdiyi ölkə müsəlman bir dövlət olan Azərbaycanın ərazilərini zəbt edib. Ermənilərin təcavüzkar siyasəti bir milyondan artıq qaçqın və məcburi köçkünün yaranmasına səbəb olub. Ermənistan işğal etdiyi Azərbaycan torpaqlarında bütün mədəni-tarixi abidələri məhv edib. İlk növbədə dağıdılan, təhqir olunan abidələr məhz dini məbədlər, məscidlər olub. Ermənilər ibadət yerlərini donuz tövləsinə çeviriblər. Bütün bunlar İranın gözü qarşısında baş verib. Ona görə də Azərbaycan ictimaiyyəti haqlı olaraq narazılıq edir ki, müsəlman İranın Azərbaycan torpaqlarını işğal edən bir dövlətə səfər etməsi, erməni rəhbərə dost və qardaş deməsi yolverilməzdir”.
Politoloq bildirib ki, iranlı siyasilər İsrail Baş naziri Benyamin Netanyahunun Azərbaycana səfəri ilə bağlı tənqidi fikirlər səsləndirdilər. Ancaq iki səfər arasında müqayisə aparmaq, bunu eyniləşdirmək qətiyyən doğru deyil:
"Əgər İsrail İranın torpaqlarını işğal etmiş olsaydı, Netanyahunun Bakı səfəri heç bir halda baş tutmazdı. Cənab Prezident İlham Əliyev dəfələrlə İranın mövqeyini müdafiə edib. Azərbaycan dövləti İrana qarşı heç bir beynəlxalq maliyyə sanksiyalarına qoşulmayıb. Hətta sırf bu mövqeyimizə görə, Qərb dairələrinin təzyiqi ilə üzləşmişik. İran bilməlidir ki, Azərbaycan-İsrail münasibətləri Azərbaycan-Fələstin əlaqələrinə qəti surətdə təsir etmir. Rəsmi Bakı Fələstin dövlətinin yaranmasını hər zaman müdafiə edib. Dövlətimiz Fələstinin Azərbaycanda səfirlik açmasına razılıq verib və onun bütün maddi xərclərini öz üzərinə götürüb. Məgər İran bunlardan xəbərsizdirmi? İranın doktrinasına görə, "müsəlmanın müsəlmandan başqa dostu yoxdur”. Bəs onda rəsmi Tehran niyə müsəlman dövləti Azərbaycanı yox, işğalçı Ermənistanı müdafiə edir? Təəssüflər olsun ki, İran tərəfi bu suallara cavab vermək əvəzinə düşmən ölkəyə səfər təşkil edir”.
İsmayıl
