Bütün gün ərzində çox güclü yükləmələrə məruz qalan ayaq pəncələrimizin alt hissəsindəki bağlarda kiçik yırtıqlar əmələ gələ bilər.
"Sherg.az”ın məlumatına görə, adətən belə mikroyırtıqlar özü özündən bitişir. Lakin bəzən bu baş vermir və bu yerdə və ətraf toxumalarda iltihab yaranır. Daban sümüyü bu iltihaba cavab olaraq böyüməyə başlayır, sümükdə iti çıxıntı əmələ gəlir.
Bu çıxıntıya "daban şporu" deyilir. Daban şporu həm bir, həm də hər iki pəncədə əmələ gələ bilər.
Kifayət qədər yayılmış daban şporu 40 yaşından sonra əmələ gəlməyə başlayır. Qadınlarda bu pozulmaya kişilərlə müqayisədə daha tez-tez təsadüf edilir.
Tibbdə bu pozulmanın səbəbləri məlum olmasa da mütəxəssislər bəzi risk faktorlarını sadalayıb.
Belə ki, daban şporunun yaranmasının səbəbləri kimi yastıpəncəlik, artıq çəki, podaqra, ayaq oynaqların xəstəlikləri və iltihabları (artroz, osteoartroz, artrit və s.), travmalar (xüsusilə daban sümüyü travmaları), maddələr mübadiləsi pozulmaları, ayaqlarda qan dövranı pozulmaları ilə müşayiət olunan xəstəliklər (şəkərli diabet və s.), həddən artıq yükləmələr (adətən idmançılarda) və bəzi onurğa xəstəlikləri göstərilə bilər. .
Daban şporların əsas simptomu hərəkət və fiziki yükləmə zamanı dabanda olan güclü ağrılardır. Belə ağrılar insan uzun müddət ərzində uzandıqdan və ya oturduqdan sonra yeriməyə başladıqda əmələ gəlir. Bunlara "start ağrılar" deyilir. Çox kəskin olan ağrılar əsasən günün birinci yarısında çox hiss olunur.
Daban şporuna şübhə yarandıqda ortoped və ya ortoped-cərrah həkiminə müraciət etmək lazımdır. Simptomlar əmələ gəldikdən dərhal sonra həkimə müraciət etdikdə xəstəlik daha asan müalicə olunur.
Daban şporu kompleks şəklində müalicə olunan problemdir. Burada dərmanlar, xüsusi ortopedik vasitələr, fizioterapiya, müalicəvi bədən tərbiyəsi və s. Müalicə üsulları istifadə oluna bilər.
Çox nadir hallarda daban şporu zamanı cərrahi müalicə tətbiq olunur.
Aysel
