"Rusiya xarici işlər naziri Sergey Lavrovun Azərbaycana səfərindən Dağlıq Qarabağ münaqişəsi ilə bağlı heç bir nəticə gözləmirəm”.
Bu barədə "Sherg.az”a Azərbaycanın sabiq xarici işlər naziri Tofiq Zülfüqarov bildirib. O qeyd edib ki, artıq Azərbaycan ictimaiyyətinin böyük hissəsi Lavrovun vasitəçilik missiyasına etibar etmir:
"Çünki o etibarı itirib. Ona görə, XİN rəhbərinin gəlişindən heç nə gözləmirəm”.
Ötən gün keçirilən Türkiyə-Rusiya prezidentlərinin görüşünü xatırladan sabiq nazir görüşdə Dağlıq Qarabağ münaqişəsi barədə müzakirələrə də toxunub:
"İnanmıram ki, prezidentlər arasında heç bir nəticə əldə olunmasın. Hesab edirəm, Dağlıq Qarabağ münaqişəsi ilə bağlı hansısa proses başlayıb, bu isə ilkin görüşlərdir. Tez zamanda nəticə gözləmək düzgün deyil. Bəzən şikayət edirlər ki, bu barədə mətbuata məlumat verilmir. Əslində bu, normaldır, çünki iştirak edən tərəflər öz mövqeyini bildirir. Bu mövqelərin müzakirəsinə və nəticələrin əldə olunmasına vaxt lazımdır.
S.Lavrov isə müəyyən bəyanatlarından sonra konkret olaraq vasitəçi etibarını itirib”.
Qeyd edək ki, XİN rəhbərinin səfəri noyabrın 19-na planlaşdırılıb. Lavrovun Bakıda Dağlıq Qarabağ münaqişəsinin həlli istiqamətində müzakirələr aparacağı bildirilir. Ehtimala görə, noyabrın 20-də Rusiya xarici işlər naziri İrəvana səfər edəcək.
Aysel Aslan
