Milli Məclisin bugünkü iclasında "Reklam haqqında" qanun müzakirə edilib.
Sherg.az-ın xəbərinə görə, deputatlar vətənpərvərlik ruhunda olan reklamlara daha geniş yer verilməsini təklif edirlər.
Xanım deputat Elmira Axundova deyib ki, bu gün reklamlarda ancaq müğənnilərin və digər reklamların şahidi oluruq: "Amma vətənpərvərliklə bağlı reklamlara rast gəlmirik. Hesab edirəm ki, reklamlarda və reklam çarxlarında vətənpərvərliklə bağlı mövzulara yer verilməlidir.
Həmçinin bu reklamlar pulsuz olmalıdır”. Millət vəkili Zahid Oruc və Fuad Muradov da həmkarının təklifini dəstəkləyib. Deputat Azay Quliyev isə bildirib ki, ildə xeyli sayda vətənpərvərlik ruhunda reklam çarxları hazırlansa da, onlar keyfiyyətsiz olduğundan efirə çıxmır: "QHT-lərə Dövlət Dəstəyi Şurası ildə xeyli sayda QHT-lərə vətənpərvərlik ruhunda reklam çarxlarının hazırlanmasını maliyyələşdirir. Lakin reklam çarxları telekanallar tərəfindən keyfiyyətsiz hazırlandığından sonda onların yayımlanması mümkün olmur. Bunu nəzərə almaq lazımdır. Əgər telekanallar keyfiyyətli reklam çarxları hazırlasalar, bu problem aradan qalxar”.
Spiker Oqtay Əsədov isə A.Quliyevə irad bildirib: "İş görəndə bir nəzarət edin, görün nə hazırlayırlar. Nəzarət edin ki, sonda belə problem yaranmasın”. Anar
