Çünki burda hər kəsin həyatına təsir göstərə biləcək qərarlar qəbul olunur
Millət vəkili Tahir Kərimli Taarif Şurasında nazirlərin şəxsən təmsil edilməsinin önəmli olduğunu bildirib. Deputat bununla bağlı Parlamentdə 2018-ci il ilin Dövlət Büdcəsi layihəsinin müzakirəsi zamanı məlumat verib.
"Mərkəzi Bankın sədri dedi ki, manat xarici şoklardan asılıdır. Mən çox narahatam. Taarif Şurası deyə bilərmi ki, yanacaq qalxacaq, ya yox? Çünki qalxsa, qiymət artımı baş verəcək. Deputat həmkarlarım da çıxışlarında bu məsələdən narahatlığını dilə gətirdilər. Məncə, Taarif Şurasına ya nazirlərin özləri daxil olsun, ya da bu məsələyə hökumət nəzarət etsin”.
Deputatın təklifi ilə bağlı "Şərq”ə açıqlama verən hüquqşünas Əliməmməd Nuriyev Taarif Şurasına nazirlərin və ya hökumətin nəzarət etməsi məsələsinin düzgün variant olduğunu bildirib. Hüquqşünasın sözlərinə görə, indiki halda Taarif Şurasına nəzarət üçün daha doğru model nazir və nazir müavinləridir və bu, normal platforma sayıla bilər. Lakin bunun üçün Taarif Şurası haqqında qanunun qəbul edilməsinə ehtiyac var: "Çünki nazirlərə səlahiyyətlərin verilməsi qanunla tənzimlənməlidir. Onlar bu və ya digər məsələlərlə əlaqədar qərar qəbul edirlər. Ona görə də belə səlahiyyətlərin verilməsi yalnız qanunla müəyyənləşdirilməlidir.
Əlbəttə, 2-ci təklifi də başa düşmək olar. Taarif Şurasına nəzarəti hökumət həyata keçirə bilər. Çünki burda hər kəsin həyatına təsir göstərə biləcək qərarlar qəbul olunur. Taariflərin artması və ya azalması çox mühüm məsələlərdir”.
Ə.Nuriyev həmçinin bildirib ki, qaz, işıq və digər komunalların istehsalı yox, satışıyla bağlı bütün müəssisələr özəlləşdirilsin. Onun sözlərinə görə, satışı həyata keçirən qurumların dövlətin nəzarətində qalmasına ehtiyac yoxdu: "Özəlləşdirmək daha yaxşı olardı, eyni zamanda burda alternativlərin olması çox vacibdir. Alternativ şirkətlərin yaranması ilə vətəndaşın imkanı olacaq ki, bu şirkətdən elektriki, suyu alsın. Yoxsa bu vahid bir halda, dövlətin tam inhisarında olanda müvafiq qurumlar effektli və səmərəli fəaliyyət göstərə bilmir. Həm istehsal edir, həm də satır. O zaman həmişə qiymətlərin artırılmasına maraqlı olur.
Taarif Şurasında həmçinin ictimaiyyət və özəl sektorun nümayəndəsi olmalıdır. Çünki qərarların qəbul edilməsi prosesinin şəffaflığı əsasdır və bununla bağlı problemlər var. Təbii ki, Azərbaycan Respublikası Prezidentinin Taarif Şurasının qərarını ləğv etmək hüququ var. Bu çox yaxşıdı, amma daimi olaraq prezidentin bu məsələlərlə məşğul olmağa zamanı yoxdur. Hesab edirəm ki, burda bütövlükdə hər kəsin-bütün cəmiyyətin maraqlarının təmin edilməsi lazımdır. Çünki bu və ya digər formada bizim həyatımıza təsir edən qərarlar verilir”.
Yeganə Bayramova
