Rusiya və ABŞ prezidentləri - Vladimir Putin və Donald Trampın Parisdə tam formatlı görüşü baş tutmayacaq. Bu barədə "Kommersant" nəşri məlumat yayıb. Nəşrin yazdığına görə, Fransa Prezidenti Emmanuel Makron liderlərin görüşünə qarşı çıxıb. Makron Birinci Dünya Müharibəsinin başa çatmasının 100 illiyi ilə bağlı tədbirin Putin-Tramp görüşünün kölgəsində qalmasını istəməyib. Xatırladaq ki, Rusiya və ABŞ prezidentlərinin görüşü noyabrın 11-də Parisdə planlaşdırılırmış. Hazırda Yaxın Şərq böhranı, İrana qarşı sanksiyalar, o cümlədən Cənubi Qafqaz regionundakı proseslər fonunda ən çox diqqət çəkən məsələ Tramp-Putin görüşüdür. Bu baxımdam liderlərin bir araya gəlməsi böyük maraqla gözlənilir. Amma göründüyü kimi, müəyyən bəhanələrlə tərəflərin təmasına maneçilik törədilir.
Bu barədə "Şərq”ə danışan politoloq Əhəd Məmmədli bildirib ki, Tramp-Putin görüşünün baş tutmasının ehtimalı həmişə var. Sadəcə, indi Trampın başı daxili işlərinə qarışıb:
"Çox yaxında Amerikada Konqresə seçkilər keçiriləcək. ABŞ-ın Meksika ilə sərhəddinə Qondurasdan mühacir kalonu yaxınlaşır. Hazırda Tramp üçün bu işlərin həlli Putini görməkdən daha vacibdir. Təbii ki, bu görüş nə vaxtsa baş tutacaq. Çox güman ki, yaxın zamanlarda Trampla Putin bir araya gələcəklər. Lakin düşünmürəm ki, görüşdən sonra hər iki tərəf hansısa məsələdə ciddi razılıq əldə etsin. Ukrayna, Suriya və İranla bağlı məsələlərdə mövqelər fərqlidir. Üstəlik, Polşada Amerika bazasının qurulması söhbəti gedir. Bunun müqabilində ruslar Vaşinqtonu Belarusda hərbi bazanın qurulması ilə hədələyirlər”.
Analitik vurğulayıb ki, Trampın özünə qalsa, Putinlə bir çox məsələdə anlaşardı. Lakin ABŞ-da Rusiyadakı kimi hakimiyyət tək bir şəxsin əlində cəmləşmədiyi üçün Trampla Putinin bir çox məsələlərdə anlaşması mümkünsüz görünür.
Düşünürəm ki, bundan sonra da ABŞ-Rusiya münasibətləri gərginləşməyə doğru gedəcək. Moskvaya qarşı sanksiyalar artacaq. Həmçinin, dünyanın siyasi xəritəsində ABŞ-la Rusiya əvvəlki mövqelərinə sahib deyil. Ona görə də iki ölkənin anlaşması dünya üçün o qədər də vacib sayılmır. Gördüyünüz kimi, Makron Trampla Putinin görüşünü əngəlləməyə nail olur.
Ərdoğan regionda müstəqil siyasət aparır. Angela Merkel Avropada istədiyini edir. Yəni demək istəyirəm ki, dünya get-gedə daha çox qütblərə ayrıldıqca, Trampla Putinin görüşləri dəyərini itirəcək”.
İsmayıl
