"Ermənistan xüsusilə Dağlıq Qarabağ və Laçın, Kəlbəcər rayonları ərazisində özlərinin, xarici dövlətlərin şirkətləri ilə uzun illərdir layihələr həyata keçirir”.
Bunu "Sherg.az”a ermənilərin işğal olunmuş Azərbaycan torpaqlarında gördüyü qanunsuz işlərlə bağlı danışarkən millət vəkili Elman Məmmədov deyib.
Onun sözlərinə görə, bu proses uzun illərdir, torpaqlarımız işğal olunandan bəri davam edir:
"Xəbərlər yayılır ki, Zəngilanda, Laçında, Şuşada və digər ərazilərdə məskunlaşma aparılır. Ancaq layihələr bütün təbii sərvətləri talamaq üçün həyata keçirilir. Kəlbəcərdə və digər ərazilərdə qızıl yataqları talanır, istisudan istifadə edirlər, sanatoriyalar tikib, yollar çəkiblər, mədəni və tarixi abidələrimizi dağıdıblar. Təbii ki, qarşısı alınmasa, bu layihələrin sayı çoxalır, proseslər intensivləşir.
Ermənilərin qarşısını almaq üçün bəyanat, xəbərdarlıq verməklə nə isə əldə etmək mümkün deyil. Bütün bunlara son qoymaq üçün yeganə yol torpaqları işğaldan azad etməkdir. Bunu həyata keçirməyin yeganə yolu isə hərbi yoldur. Ermənilərin təşkil etdiyi qondarma qurum ləğv edilməli, cinayətkarlar cəzasını almalıdır. Dağlıq Qarabağda layihə həyata keçirmək istəyən şirkətlər isə Azərbaycandan icazə almalıdır.
Bu gün ərazilərimiz işğal altında olduğundan işğalçı qurum istədiyini edir. Azərbaycan belə halların qarşısını ala bilmir”.
"Ermənistan ağır iqtisadi şəraitin məngənəsində sıxıldığı bir dönəmdə bu layihələrə necə maliyyə ayırır ?" sualına gəlincə, deputat diqqətə çatdırıb ki, ermənilər işğal altındakı ərazilərə cüzi investisiya yatıra bilir:
"Çünki həqiqətən də Ermənistan iqtisadiyyatı bu gün dağılmış vəziyyətdədir. Böyük investisiyaların əksəriyyəti isə dünya erməniləri tərəfindən qoyulur. Başqa ölkələrdə yaşayan varlı ermənilərin dəstəyi, təbliğatı ilə aldadılmış xarici şirkətlər işğal altındakı ərazilərə cəlb edilir. Ona görə, iri layihələr həyata keçirilə bilir.
Ermənilərlə həmrəy olan iş adamları, fərqli qurumlar var. Elə ötən günlərdə qardaş ölkə Türkiyənin bir neçə vətəndaşının Dağlıq Qarabağa qanunsuz səfər etməsi də bunu göstərdi. O qədər belə ermənipərəst insanlar var ki. Din qardaşımız olan İran İslam Respublikası da bu hadisələr başlayandan ermənilərlə həmrəydir.
İşğal olunmuş ərazilərdə dağıdılmış, viran qoyulmuş ərazilərin tikinti materiallarını onlar daşıyıb, aparmadımı? Bu gün də onlar ermənilərlə iş birliyindədir. Ermənilərin pulu olmasa da, müxtəlif təbliğat vasitələri ilə xarici sərmayəçiləri işğal edilmiş Azərbaycan ərazilərində iri layihələrə cəlb edirlər”.
Aysel Aslan
