Mətbuat Şurasının sədri, millət vəkili Əflatun Amaşovun Milli Məclisin Azərbaycan-Gürcüstan parlamentlərarası əlaqələr üzrə işçi qrupunun rəhbəri təyin olunması təklif edilib.
Məlumata görə, bu məsələ "Milli Məclisin parlamentlərarası əlaqələr üzrə işçi qruplarının rəhbərlərinin seçilməsi haqqında” sənəddə əksini tapıb. Sənədə əsasən Ə.Amaşov həmin vəzifədə deputat həmkarı Qənirə Paşayevanı əvəz edəcək.
Qeyd edək ki, layihə martın 4-də Milli Məclisin plenar iclasında müzakirəyə çıxarılacaq.
Borçalıdan olan tarixçi-alim Kərəm Məmmədov "Şərq”ə açıqlamasında təklifi müsbət dəyərləndirib: "Qırmızı körpü” Azərbaycanla Gürcüstanı ayıra da bilər, birləşdirə də bilər. Gərək ki, hazırkı beynəlxalq durum nəzərə alınaraq bu ölkələri birləşdirən cəhətlərə üstünlük verilsin. Amma Borçalının və Car, Balakən, Şəki bölgələrinin tarixini gözəl bilmək lazımdır ki, birləşdirici istiqamətləri üzə çıxarmaq mümkün olsun. Tarix təkamüldür deyirlər. Tarix elmi ağıllılar üçün ibrət dərsidir. Axmaqlar üçün isə faciədir. Ən azından onu nəzərə almaq lazımdır ki, Gürcüstan dövlətçiliyinin yaranmasında, inkişafında və bugünkü varlığında orada yaşayan Azərbaycan türklərinin çox böyük rolu olub. Gürcü həmkarlarım tarixi vərəqləyib XI-XIII və XX əsrlərin əvvəllərində oradakı soydaşlarımızın Borçalı uğrunda gedən erməni-gürcü müharibəsindəki xidmətlərini yada salsalar, o zaman Azərbaycanla dostluğa üstünlük verərlər. Əflatun müəllimə böyük etimad göstərilir. Uğurlar arzu edirik”.
"Borçalı” Cəmiyyətinin sabiq sədri Eyvaz Borçalı da qeyd edib ki, Ə.Amaşov üçün çox böyük imkanlar var və o, çox yaxşı işlər görə bilər: "Gürcüstanda yaşayan soydaşlarımız təhsil, təhlükəsizlik və digər problemlərini həll edə bilər”.
Ayyət Əhməd
