Bakı-Gəncə-Bakı sürətli sərnişin qatarının qiymət cədvəlində dəyişiklik edilib. Azərbaycan Dəmir Yolları QSC-dən verilən məlumata görə, aprelin 8-dən etibarən qiymətlər 50 manatdan 25 manata endirilir. Standart və Birinci klass yerlərin gediş haqqı isə dəyişilmədən saxlanılır.
Qiymətlərin endirilmə səbəbləri ilə bağlı "Sherg.az”a danışan iqtisadçı-ekspert Nazim Məmmədov bildirib ki, Novruz bayramı ərəfəsində qiymətlər azalsa da, aparılan monitorinqlər sərnişin qatarının insanlara heç də cəlbedici görünmədiyini göstərir:
"Çünki adekvat olaraq alternativ maşrutlarda qiymət daha ucuza başa gəlir. Əgər tələbələr, pensiyaçılar və digər şəxslər üçün güzəştlər olsaydı, sərnişinlərin sayı da çoxalardı.
Məlumatıma görə, heç bir güzəşt yoxdur. Ona görə də, bu marşrut sərnişinlər üçün cəlbedici görünmür. Hesab edirəm ki, dəmir yolları qiyməti azaltmaqda davam etməli, optimallaşdırmalıdır. Əgər qiyməti 10 manat azaltsaydılar, bu, o qədər də diqqəti cəlb etməzdi.
Yəni, ortaq məxrəcə gəlmək lazımdır ki, vətəndaşlar qiymətin bahalığından çəkinməsinlər. Məsələn, bir ailənin gedib-gəlməsi onlara baha başa gəlməli deyil.
O cümlədən uşaqlara, məktəblilərə, tələbələrə, pensiyaçılara, hərbiçilərə və digər qrup şəxslərə güzəştlər tətbiq olunmasının tərəfdarıyam. Güzəştlər tətbiq edilərsə, ola bilər ki, bu qatara tələbat artsın və sərnişinlər çoxalsın”.
Yeganə Bayramova
