Azərbaycanda ümumtəhsil məktəbləri rəhbərlərinin fəaliyyəti işin həcmindən və keyfiyyət göstəricisindən asılı olaraq stimullaşdırılacaq. Bu barədə "Azərbaycan Respublikası Nazirlər Kabinetinin 2015-ci ildə fəaliyyəti haqqında hesabat”ında əks olunub.
Təhsil Nazirliyinin təklifləri əsasında "Dövlət ümumi təhsil müəssisələrinin direktorunun, direktorun tədris (təlim-tərbiyə) işi, lisey (gimnaziya) və digər profil üzrə müavinlərin aylıq vəzifə maaşlarına əlavələrin və birdəfəlik mükafatın müəyyən edilməsi haqqında” qərar layihəsi hazırlanıb. Layihənin hazırlanmasında əsas məqsədlərdən biri ümumi təhsilin keyfiyyətinin yüksəldilməsidir.
Təhsil eksperti Nabatəli Qulamoğlu isə bu layihəni birmənalı şərh etməyin çətin olduğunu deyib: "Çünki məktəb direktorları mahiyyət etibarı ilə müxtəlif olurlar. Nazir tərəfindən yenicə təyinat alan məktəb direktorları var ki, onlara məktəblərdə qayda-qanun yaratmaq, təhsilin keyfiyyətini yüksəltmək barəsində ciddi tapşırıqlar verilib. Hansı ki belə məktəblərə nadir hallarda rast gəlmək olur və onların sayı barmaqla sayılacaq qədər azdır. Elə direktorlar da var ki, artıq əli oğurluğa öyrəşib. Sözügedən qərarın tətbiqi isə onların əl-qolunu daha da açacaq. İşin həcmindən və keyfiyyət göstəricisindən asılı olaraq fəaliyyətini stimullaşdırmaqla onların rəhbərlik etdiyi məktəblərdə təhsilin keyfiyyətini yüksəltmək inandırıcı görünmür. İşə qəbul olan zaman müvafiq prosedur qaydalarından keçən məktəb direktorları müəyyən mənada tələblərə cavab verən şəxslərdir. Onların fəaliyyətini stimullaşdırmaqla effektiv nəticələr əldə etmək olar. Sözügedən qanun layihəsini bütün direktorlara şamil etmək yanlış olardı. Ya bu layihəni saxlasınlar məktəb direktorlarının dəyişdirilməsi prosesi başa çatandan sonra tətbiq etsinlər, ya da fərdi qaydada tətbiq etsinlər”.
Şəymən
