"Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov girovlarımız - Dilqəm Əsgərov və Şahbaz Quliyevin qaytarılması üçün konkret addımlar atır”.
Bunu "Sherg.az”a Kəlbəcərdə yaxınlarının məzarını ziyarət edərkən erməni separatçıları tərəfindən girov götürülən Dilqəm Əsgərovun oğlu Kürdoğlu Əsgərov deyib.
O söyləyib ki, Ə.Həsənov Cenevrədə Beynəlxalq Qızıl Xaç Komitəsinin (BQXK) prezidenti ilə görüşəndən bir müddət sonra girovlarımızla videogörüntülü danışa bildik:
"Bundan əlavə Dövlət Təhlükəsizlik Xidməti, Müdafiə Nazirliyi və Girovların hüquqlarını Müdafiə Komitəsi çox işlər görür. Elə gedişatlar var ki, mətbuata açıqlaya bilmərəm. Yalnız onu demək istərdim ki, cənab Prezident şəxsən bu məsələni diqqət mərkəzində saxlayır. Hər zaman vurğulamışam, indi də qeyd edirəm ki, güclü Azərbaycan dövlətinin, liderimiz İlham Əliyevin sayəsində mən atama qovuşacağam. Tək mən deyil, girovların yolunu gözləyən hər kəs onlara qovuşacaq”.
Qeyd edək ki, 2014-cü il iyulun 10-da Dilqəm Əsgərov və Şahbaz Quliyev Azərbaycanın işğal altında olan Kəlbəcər torpaqlarında Ermənistan silahlı qüvvələri tərəfindən girov götürülüb. Kəlbəcərə yaxınlarının məzarını ziyarətə gedən kəlbəcərli girovlarla bağlı həmin ilin dekabr ayında qondarma məhkəmə prosesi keçirilib. Separatçı rejimin qərarı ilə qurulan oyuncaq məhkəmə D.Əsgərovu ömürlük, Ş.Quliyevi isə 22 il müddətinə "azadlıqdan məhrum” edib. Girovların azad edilməsi ilə bağlı bir çox addımlar atılsa da, onları azad etmək hələ mümkün olmayıb. Hazırda onlarla əlaqə yalnız Beynəlxalq Qızıl Xaç Komitəsinin nümayəndələri vasitəsilə saxlanılır.
Aysel Aslan
