"Avropa İttifaqı ölkələri PKK üzvlərinə sığınacaq verir və terrorçuların müxtəlif aksiyalar keçirməsinin qarşısını almır”. Bunu Türkiyə Prezidenti Rəcəb Tayyib Ərdoğan bildirib. Prezident deyib ki, terror qruplaşmasının üzvləri Berlinin, Parisin, Avstriyanın küçələrində yürüşlər təşkil edirlər.
Lakin "terrora qarşı olduğunu” iddia edən Qərb dövlətləri buna qarşı çıxmırlar: "Avropa İttifaqı guya PKK-nı dəstəkləmir və terror təşkilatı kimi qəbul edir. Əgər belədirsə, nə üçün terrorçular polisin mühafizəsi altında gəzirlər, nə üçün separatçı təşkilatın liderinin portreti inzibati binalardan asılır? Avropa ölkələri özlərini elə göstərirlər ki, guya PKK-ya qarşı mübarizə aparırlar, əslində isə tam dəstək verirlər”.
Xatırladaq ki, Türkiyə rəsmiləri dəfələrlə Almaniya və Fransanın kürd terrorçularına açıq-aşkar yardım etməsini qınayıblar. Lakin xəbərdarlıqlara baxmayaraq, Avropa dövlətləri qardaş ölkənin baş bəlasına çevrilmiş PKK-ya qol-qanad verməkdən vaz keçməyiblər. Hiddət doğuran məqam odur ki, PKK-ya verilən dəstəklə yanaşı, ABŞ tərəfindən digər bir terror təşkilatı - PYD-yə də yardım edilir.
Məsələ ilə bağlı "Şərq”ə açıqlama verən siyasi elmlər namizədi, beynəlxalq məsələlər üzrə ekspert Zaur Məmmədov deyib ki, şəxsən Prezident Ərdoğan dəfələrlə Avropa ölkələrinə sərt formada irad bildirib, onları terrora dəstək verməkdən imtina etməyə çağırıb:
"Türkiyə-Qərb münasibətlərində ən önəmli məsələlərdən biri məhz kürd terrorçularına yanaşmadır. ABŞ və Avropa ölkələri bir tərəfdən bəyan edirlər ki, Türkiyə onlar üçün dost və müttəfiq dövlətdir. Qardaş ölkənin strateji əhəmiyyətinin böyük olduğunu vurğulayırlar. Lakin buna məhəl qoymadan müttəfiq adlandırdıqları ölkənin milli və dövlət maraqlarını heçə endirir, görməzdən gəlirlər.
Təbii ki, bu cür yanaşma bərabər hüquqlu münasibətlərdə heç də müsbət hal kimi dəyərləndirilmir. Məsələ ondadır ki, Türkiyə Avropa Birliyinin, ümumiyyətlə, Qərb dövlətlərinin Yaxın Şərq regionunda əsas müttəfiqi sayılır.
Türkiyə demək olar ki, hər zaman Avropa qarşısında götürdüyü öhdəlikləri yerinə yetirir. Ancaq Ankara hökuməti bunun müsbət qarşılığını heç vaxt görmür”.
İsmayıl
