Bakıda binadan avtomobilin üzərinə paltaryuyan maşın atıblar. Hadisə paytaxtın Nəsimi rayonu ərazisində, "Moskva” univermağının yaxınlığındakı binanın qarşısında baş verib.
Həmin binanın 8-ci mərtəbəsinin eyvanından atılan paltaryuyan maşın həyətdə dayanan "LEXUS” markalı bahalı avtomobilin üzərinə düşüb. Nəticədə avtomobil yararsız vəziyyətə düşüb.
Maraqlıdır, insanların bu cür davranışları nədən irəli gəlir? Təəssüf ki, cəmiyyət olaraq tez-tez belə xoşagəlməz hallarla qarşılaşırıq. Müxtəlif yararsız əşyaları qalıntıları eyvandan atan insanlar hələ də var. Paltaryuyan maşının eyvandan aşağı atılması isə necə deyərlər, "suyu daşıran son damcı oldu...”. Bəs, insanlar belə addım atmaqla nəyə siqnal vermək istəyirlər?
Mövzu ətrafında "Şərq”ə danışan sosioloq Əhməd Qəşəmoğlu bildirib ki, insanların bu cür davranışları heç bir normalara uyğun deyil. Etinasızlıq, qudurğanlıq hissinin gücləndiyini deyən sosioloq həmçinin insanlarda psixoloji sarsıntıların da çoxaldığını diqqətə çatdırıb. Onun sözlərinə görə, belə gərginlik sonda da məhz belə neqativ hallara səbəb olur:
"Əvvəlki illərdə insanlara mədəni və məsuliyyətli davranışı təlqin edirdilər. Orta məktəb müəllimlərinin davranışı yeni nəslin daha intizamlı böyüməsinə kömək edirdi. Təəssüf ki, indi həm cəmiyyətin özündə, həm də ailələrdə gərginlik çoxalıb. Məktəblərdə də qabaqkı kimi nizam-intizam yoxdur. Nəticədə etinasız, durduğu yerdə özünü daha da nümayişkaranə aparıb sanki özünün üstünlüyünü göstərmək istəyən insanlar çoxalıb. İnsanlarda psixoloji sarsıntı, qorxu və digər azruedilməyən vəziyyət var. Bunlar hamısı davranışa təsir edir.
Eyni zamanda insanların baxdıqları filmlər, eşitdikləri informasiyalar, bütün gün oğrular aləmi barədə "bəzəkli” məlumatlar onlarda vəhşiliyi artırıb. Bəzən görürsən ki, ailələrdə də şikayət edirlər ki, "oğlum hansısa əşyanı sındırdı və yaxud evdəki bahalı bir şeyi atdı. Burda həm psixologiya, həm də mədəniyyət var. Psixoloji sarsıntı ilə mədəniyyətsizlik biri-birinə qarışıb və nəticədə belə arzuolunmayan təbəqə formalaşıb”.
Yeganə Bayramova
