Mətbuatda yayılan məlumata görə, Sumqayıt şəhərinin icra başçısı Zakir Fərəcov son keçirdiyi iclasda məktəblərdə qadın müəllimlərin şalvar geyinməsini qadağan edib. hətta qadın müəllimlərin şagirdlərin qarşısına şalvarda yox, rəsmi formada çıxmalı olduğunu vurğulayan icra başçısının göstərişlərinə məktəblərdə əməl edilməyə başlanıldığı da qeyd olunub.
Belə ki, qadınlar şalvarda deyil, pencək-yubka geyinərək şagirdlərin qarşısına çıxırlar. Eyni zamanda Z.Fərəcov məktəb və bağçaları gözlənilmədən təftiş edir. İndi təhsil müəssisələri əvvəlcədən xəbər vermədən gələn icra başçısını hər an gözləyirlər. Azad Müəllimlər Birliyinin sədri Məlahət Mürşüdlünün qənaətincə, pedaqoqların məktəbə aşırı bər-bəzəkli, sinəsində yazılı şəkillərdən ibarət, həmçinin çoxlu sayda zinət əşyaları ilə gəlmələri yolverilməz haldır: "Müəllim şagirdə təkcə bilik vermir, müəllim həm də şagirdə estetik tərbiyə verməlidir. Təəssüf ki, son zamanlar müəllimlər açıq-saçıq geyimlərə daha çox üstünlük verirlər. Bədənin əzalarını göstərən şalvarların geyinilməsi, kəmərlərin bağlanması şagirdlər üçün çox pis örnəkdir. Son illər də retuz kimi şalvarlar dəbə minib. İnsanda ikrah oyadır. Mən qadın müəllimlərin məktəbə şalvar geyinməsinin əleyhinə deyiləm. Müəllimlər şalvar geyə bilərlər. Amma o halda ki, yalnız qara rəngdə və əzaya yapışmayan olsun”. Xarici ölkələrdə qadın müəllimlərin məktəblərə şalvar geyinməsinə rəsmi qaydada icazə verildiyini vurğulayan xanım ekspertin sözlərinə görə, elə bizə qonşu olan Gürcüstanda və qardaş ölkə Türkiyədə bu cürdür: "Türkiyənin istənilən fənn müəllimi sinifə daxil olanda ağ xalat geyinir. Kosmetik vasitələrdən istifadə etmirlər. Bu mənada şalvar qadağasından daha çox geyimlərin sadələşdirilməsinin tərəfdarıyam. Burada isə əsas məsuliyyət müəllimlərin öz üzərinə düşür. Bizim gənc müəllimlərimiz məktəbə elə formada gedir ki, kənardan baxan onun toya getdiyini düşünür”. Yerli icra orqanlarının orta məktəblərdəki nizam-intizama müdaxilə səlahiyyətinin olub-olmamasına gəldikdə isə yerli təhsil şöbələrinin icra strukturlarının bir şöbəsi olduğunu deyib: "Ancaq bu o demək deyil ki, icra başçıları məktəblərdə kadr təyinatına, tədrisin gedişinə, təlim- tərbiyəyə müdaxilə etməlidir. Sadəcə olaraq, bu məsələ "Təhsil haqqında” qanunda açıq qaldığı üçün icra orqanları orta məktəblərdə öz diktəsini yeridir. Hətta müəllim təyinatı, mükafatlandırılması, müəllimin işdən çıxarılması kimi proseslərə "əl” qoyur. Ancaq xarici təcrübə göstərir ki, yerli icra hakimiyyətləri məktəblərin maddi-texniki bazasının gücləndirilməsi, kommunal xidmətlərinin yüksək səviyyədə təşkili kimi işlərlə məşğul olmalı, təlim-tədrisin keyfiyyətinə, kadr təyinatına qarışmamalıdır”.
Şəymən
