Gürcüstanın eks-prezidenti Mixail Saakaşvili "Facebook” sosial şəbəkəsi vasitəsilə hakim partiya və rəhbəri Bidzina İvanişviliyə qarşı birləşməyə çağırıb. Saakaşvili bildirib ki, İvanişvili Gürcüstanın düşmənidir və Gürcüstan məhv olmaq təhlükəsi altındadır:
"Bütün müxalif qüvvələrə səslənərək, nə qədər ki, vaxt var, birləşməyə çağırıram. Bütün fikir ayrılıqlarını bir kənara qoyaq. Biz bu il böyük dəyişikliklərə nail olacağıq, Gürcüstanı yer xəritəsindən silinməyə qoymayaq. Bu, real təhlükədir”. Ekspertlərə görə, Saakaşvilinin çağırışı ölkənin müxalif qüvvələri tərəfindən ciddi qəbul edilə bilər. Çünki indiki hakimiyyətdən narazılıq yüksəkdir.
Qonşu ölkədəki durumla bağlı "Şərq”ə danışan politoloq Azər Rəşidoğlu Gürcüstanda vəziyyətin o qədər də yaxşı olmadığını deyib. Analitik vurğulayıb ki, Moskva Gürcüstanı parçalayıb, Abxaziya və Osetiya separatçıların əlindədir:
"Rusiya inkişaf etmiş Gürcüstanın varlığında maraqlı deyil. Gürcüstan Qərblə inteqrasiyaya çalışır. NATO-nun və Avropa Birliyinin (AB) üzvü olmağa çalışır. Aİ ilə assossiativ saziş imzalayıb. Bu baxımdan, Gürcüstan cəmiyyətinin fikri dəyişir. Saakaşviliyə inam yenidən bərpa olunur. İndiki hakimiyyət nüfuzunu itirir. İnsanlarda belə inam var ki, Saakaşvili qayıdarsa, böyük işlər görə bilər. Bu gedişat isə Rusiyanı narahat edir. Moskva Qərbyönümlü siyasətin Gürcüstanda dominant olmasına qarşıdır. Bu baxımdan, bu ölkədə müəyyən ssenarilər hazırlaya bilər. Saakaşvilinin də narahatlığı elə bundandır”.
İsmayıl
