"Əslində qadın hüquqlarından, kişilərin qadınlara qarşı zorakılığından söhbət getməməlidir. Bu gün diqqət mərkəzində daha çox ailə və ailənin problemi olmalıdır”.
Bunu "Sherg.az”a qadın zorakılığına qarşı çağırışların güclənməsinin mənfi tərəflərini izah edərkən sosioloq, professor Əhməd Qəşəmoğlu deyib.
O bildirib ki, bu məsələ kompleks şəkildə həll edilməlidir:
"Kişiləri bəzən vəhşi kimi qələmə verirlər. Sanki kişilər gündən-günə vəhşiləşir, yazıq qadınların isə hüquqlarını müdafiə etmək lazımdır. Bu, düşmən psixologiyası yaradır. Bununla ölkədə gərginlik yaradılır. Kişilərə istiqamətlənmiş maarifləndirmə, milli adət-ənənələrin aşılanması addımları atılmır. Qadınları isə daha da həvəsləndiririk ki, daha da sərbəst olsunlar. Qadınlara azadlığın nə olduğunu yaxşı izah etmədən, "azad olmalısınız” deyirik. Qadınlar azadlığı tam dərk etmədən bunun üçün mübarizə aparır. Nəticədə cəmiyyətdə dəhşətli gərginlik yaranır. Düşünürlər ki, guya qadınlar hüquqlarını yaxşı bildikdə evdə, ailədə sakitlik olacaq. Bu, tamamilə yanlışdır, qızışdırıcı vasitədir.
Söhbət ailədən getməlidir. "Azərbaycanda ailə hansı əsaslarla qurulmalıdır, ailə öz funksiyasını necə yerinə yetirməlidir ?" kimi suallara cavab tapmalıyıq. Beləliklə, həm qadının, həm kişinin xoşbəxt olmasına nail olmaq olar. Yoxsa, "kişilər vəhşiləşib, qadınları azad olmağa imkan vermir” fikirləri yersiz, düşmən siyasətidir”.
Aysel Aslan
