"Cəzaçəkmə müəsisələrindəki məhkumların məşğulluğunun artırılması üçün həbsxanalarda istehsal sahələrinin yaradılmasına ehtiyac var”. Bunu büdcə layihələrinin müzakirəsi zamanı İnsan hüquqları üzrə müvəkkil Elmira Süleymanova çıxışı zamanı deyib. Ombudsman bildirib ki, istehsal sahələri yaradılarsa, cəza çəkən məhbusların məşğulluğu təmin edilər.
Eyni zamanda məhbuslar ailələrinə pul qazanıb göndərər və yaxud hər hansı borcunu ödəyər. Bu addım həm də dustaqların hər hansı peşə fəaliyyətinə yiyələnərək, cəmiyyətdən hərtərəfli təcrid olunmamasına, həmçinin, dövlətə fayda vermələrinə gətirib çıxarar. İnsan hüquqları üzrə müvəkkil Elmira Süleymanovanın təklifi hüquq müdafiəçiləri tərəfindən də dəstəklənib.
Dilarə Əliyeva adına Qadın Hüquqlarını Müdafiə Cəmiyyətinin sədri Novella Cəfəroğlu "Şərq”ə deyib ki, hüquq müdafiəçiləri 5 ildən artıqdır bu məsələni qaldırırlar:
"Hər zaman vurğulamışıq ki, cəzaçəkmə müəssisələrində ilk növbədə yaxşı iş imkanları yaradılmalıdır. O halda dustaqlar həm müxtəlif peşələrə sahib olarlar, iş-güc öyrənərlər, həm də bekarçılıqdan neqativ əməllərlə məşğul olmazlar. Elmira xanımın təklifi çox gözəldir, hamımız dəstəkləyirik. Sadəcə proses elə qurulmalıdır ki, əlavə problemlər yaranmasın”.
N.Cəfəroğlu xatırladıb ki, əvvəllər həbsxanalarda istehsal sahələri mövcud idi:
"Məsələn, vaxtı ilə qadınlar üçün cəzaçəkmə müəssisələrində xalçaçılıq istehsal sahəsi yaratmışdıq. Orada dustaq xanımlara xalça toxumağı öyrədirdilər. Məhbus qadınlar həm özlərinə, həm də ailələrinə yetəcək qədər pul qazana bilirdilər. Bununla bağlı bir çox məhbuslar bizə müraciət ediblər. Onlar özləri də maraqlıdırlar ki, cəza çəkdikləri yerlərdə iş imkanları yaradılsın”.
İsmayıl
