İnsult diaqnozu ilə Mərkəzi Klinik Xəstəxanaya yerləşdirilmiş jurnalist Natiq Qocamanın durumu ağır olaraq qalır. Jurnalistin həyat yoldaşı Könül Ayrapa bu barədə sosial şəbəkədə xəbər paylaşıb. K.Aypara səhiyyə naziri Oqtay Şirəliyevə müraciət edərək 1 saylı Klinik Tibbi Mərkəzdəki şəraitdən şikayət edib.
Qeyd edək ki, fevralın 1-i axşam saatlarında Natiq Qocaman insult diaqnozu ilə təcili tibbi yardım vasitəsi ilə 1 saylı Klinik Tibbi Mərkəz (Semaşko) xəstəxanasına yerləşdirilib. Ordakı şərait normal olmadığı üçün xəstə bir neçə saat sonra Mərkəzi Klinik Xəstəxanasına aparılıb.
N.Qocamanın həyat yoldaşı Könül Aypara vəziyyətinin bu qədər ağırlaşmasını «Semaşko» xəstəxanasındakı vəziyyətin bərbad olması ilə əlaqələndirir. Xanım jurnalist media vasitəsilə Səhiyyə naziri Oqtay Şirəliyevə müraciət edərək, 1 saylı Kliniki Tibbi Mərkəzdəki vəziyyəti nəzarətə götürməyi xahiş edib:
''Xəstəxanada iynəni yaş salfetlə vururdular. Etiraz edəndə isə deyirdilər ki, get hara istəyirsən, şikayət elə. Elə mən də nazirə şikayət edirəm və ümid edirəm ki, Oqtay Şirəliyev məsələ ilə bağlı müvafiq tədbir görəcək'' .
"BakuPost" xəbər verir ki, jurnalistin həyat yoldaşı Könül Aypara həkimlərin xəstəyə vaxt təyin etdiyini deyir: "Həkimlər 72 saat vaxt qoyublar. Dua edin... Sizdən istəyim budur. 72 saatdan asılıdır taleyimiz”.
Qeyd edək ki, Natiq Qocaman «Mediapress» informasiya agentliyinin baş redaktorudur, «Tərəqqi» medalı ilə təltif edilib. N.Qocaman uzun müddət "Oxu məni'' qəzetinin baş redaktoru vəzifəsində çalışıb.
Məlahət
