"NATO Gürcüstanda yerləşməyə başlayır”.
Bunu "Şərq”ə açıqlamasında "Atlas” Araşdırmalar Mərkəzinin rəhbəri Elxan Şahinoğlu deyib. Politoloq NATO-nun önəmli qərarlar verdiyini bildirib. Ekspert vurğulayıb ki, hərbi alyans Polşada tikintisinə 260 milyon dollar xərcləyərək hərbi anbar tikəcək. Bu anbar ABŞ-ın Şərqi Avropadakı əməliyyatlarına dəstək məqsədilə tikiləcək:
"Polşa buna çoxdan çalışır. Çünki Varşava özünü Rusiya təhlükəsindən qorumaq istəyir. Polşa-Rusiya münasibətlərinin yaxın tarixi də bundan xəbər verir. Digər tərəfdən NATO-nun baş katibi Yens Stoltenberq bildirib ki, Şimali Atlantika Bloku Qara dənizdəki fəallığını artıracaq. Məqsəd Rusiyanın bu bölgədəki aqressiv hərəkətlərini önləməkdir.
Baş katib onu da əlavə edib ki, Şimali Atlantika Bloku Ukraynaya və Gürcüstana əməli dəstəyi artıracaq. Stoltenberq bunu belə izah edib: "Ukraynanın və Gürcüstanın hərbi hazırlıqlarını gücləndirəcəyik, o cümlədən bu iki ölkənin dəniz qüvvələrinin bacarıqlarının artırılmasına yardım edəcəyik”.
Ekspert vurğulayıb ki, beləliklə, Ukrayna və Gürcüstan addım-addım NATO üzvlüyünə yaxınlaşırlar:
"Hər iki dövlət Azərbaycanın strateji tərəfdaşlarıdır. Bu baxımdan Ukraynanın və Gürcüstanın NATO üzvlüyünə biz də hazırlaşmalıyıq ki, həmin gün yetişdikdə "nə edəcəyik” sualına qəfil yaxalanmayaq”.
İsmayıl
