Hər il mart ayının 31-i respublikamızda azərbaycanlıların soyqırımı günü kimi qeyd olunur. 100 il əvvəl - 1918-ci ilin martında daşnak-bolşevik birləşmələrinin törətdikləri amansız qətliamların əsas məqsədi azərbaycanlıları milli etnos kimi yer üzündən silmək, onların torpaqlarına yiyələnmək olub.
Soydaşlarımıza qarşı törədilən amansızlıqlarla bağlı hər il dövlət səviyyəsində tədbirlər, xüsusi konfranslar təşkil olunsa da, bununla kifayətlənmək olmaz. Tarixi yaddaşlarda yaşatmağın bir yolu da mənsub olduğu ölkənin kitablarında, dərsliklərində, ədəbiyyatında, küçələrində, düşüncələrdə yaşatmaqdır. Bu baxımdan Azərbaycanın tarix boyu ermənilər tərəfindən məruz qaldığı soyqırımın, zaman-zaman yaşadığı faciələri hər gün xatırlamağın bir yolu da tarixin əbədiləşdirilməsidir.
31 mart soyqırımının xarici ölkələrdə tanıdılması ilə bağlı fikirlərini "Şərq”lə bölüşən Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) Seçki Qərargahının rəhbəri, tarix elmi üzrə fəlsəfə doktoru Məhərrəm Zülfüqarlı bildirib ki, xalqımıza qarşı törədilən amansız qətliamla bağlı müxtəlif dillərdə kitablar nəşr olunmalıdır:
"Ümummilli lider Heydər Əliyevin 1998-ci ilin mart ayındakı sərəncamından sonra azərbaycanlılara qarşı törədilən soyqırımla bağlı daha çox kitablar yazıldı. Mənim də Şamaxı soyqırımı və Qaradağlı faciəsi ilə bağlı kitabım var. Biz ilk növbədə bu əsərləri başqa dillərdə, xüsusilə ingilis və digər xarici dillərə tərcümə edib yaymalıyıq. Həmçinin diaspora və səfirliklərimiz də bu istiqamətdə çox böyük işlər görməlidir ki, dünya xalqları faciələrimiz və tariximizdən xəbərdar olsunlar. Son illər Xocalı ilə bağlı böyük işlər görüldü, Leyla Əliyevanın rəhbərliyi ilə Xocalını dünyaya tanıtma layihəsi təqdim olundu. Amma bu işlər mütəmadi getməlidir və biz bu işləri gördükcə Azərbaycanın dünya ölkələri ilə münasibətlərində, Azərbaycan haqqının tanınmasında çox müsbət rol oynayır. Düşünürəm ki, bu məsələ kampaniya xarakteri daşımamalıdır, il boyu bu işlər görülməlidir”.
Yeganə Bayramova
