Ötənlərdə iqtisadçı-ekspert Qadir İbrahimli Feysbuk hesabında Türkiyədə təhsillə bağlı maraqlı məsələyə toxunub. Ekspert Türkiyə universitetlərinə hazırlaşan abituriyentlərin Dövlət İmtahan Mərkəzinin (DİM) qəbul imtahanlarında iştirak etmələrini anlamadığını qeyd edib.
"Özü də o halda ki, DİM-dəki imtahanların nəticələri Türkiyə universitetlərinə qəbulda heç bir əlavə dividend vəd etmir, hətta sıfır bal toplasan belə (nəzrəri baxımdan), Türkiyə universitetlərinə qəbulda topladığın bal əsas götürülür.
Digər məntiqə sığmayan şərt-Türkiyənin ən nüfuzlu universitetini bitirsən belə, DİM imtahanında ən azı 200 bal yığmadığına görə, Azərbaycanda ixtisasın üzrə işləyə bilməzsən.
Düzdür, 200 bal yığmaq problem deyil, ancaq belə mənasız şərtə nə ehtiyac var? Türkiyədə ali məktəbə qəbulda riyaziyyat və məntiqdən imtahan verirlər. Azərbaycanda isə fərqli sistemdir - yəni hər qrupun öz imtahanları var. Türkiyədə oxumaq istəyən abituriyent təbii ki, bu ölkənin qaydalarına uyğun hazırlaşır. Niyə görə abituriyent eyni vaxtda həm Türkiyə, həm də Azərbaycan variantına görə, imtahanlara cəlb edilməlidir. Abituriyentin izafi yüklənməsi kimə və nəyə lazımdır?
Məsələyə aydınlıq gətirən DİM-in mətbuat katibi Xanlar Xanlarzadə "Sherg.az”a bildirib ki, DİM xaricdə təhsil məsələləri ilə məşğul olmur:
"Universitetlərin hansı qaydalarla ali təhsil müəssisələrinə qəbul prosesini aparması, hansı sənədlərin tələb olunması DİM-in fəaliyyətinə aid deyil. Bu məsələlərə Təhsil Nazirliyi baxır. DİM yalnız Azərbaycanda yerləşən ali təhsil müəssisələrinə tələbə qəbulunu həyata keçirir. Xaricdə təhsillə bağlı hər hansı bir qaydanın müəyyən olunması DİM-in səlahiyyətlərinə aid olan məsələ deyil”.
Yeganə Bayramova
