"Xəzərin hüquqi statusu Sovet İttifaqı dağılandan sonra müzakirə olunmaqdadır”.
Bunu "Sherg.az”a Xəzərin hüquqi statusu ilə bağlı işçi qrupunun oktyabrda Tehranda keçiriləcək görüşünün nəticələrini izah edərkən Orta Doğu Araşdırma Mərkəzinin rəhbəri Sədrəddin Soltan deyib.
O bildirib ki, Sovet dövründə bu məsələ keçmiş sovet respublikaları və İran arasında müzakirə olub:
"Xəzərin hüquqi statusu ilə bağlı əngəl törədən əvvəl Rusiya və İran idi. Sonralar isə Rusiya bir az sakitləşdi və yerinə Türkmənistan bir qədər narazılıq etdi. İran isə yenə öz iddialarında qalmaqdadır. Bu gün də Xəzərin hüquqi statusunda ən çox əngəli İran törətməkdədir.İran iddia edir ki, Xəzərin bölünməsində Sovetdən qalma bölgü sistemi ləğv edilməlidir və Xəzər ölkələrin ərazisinə və əhalisinin sayına görə bölünməlidir. Təbii ki, bu, bəhanədir və əslində vaxt keçirməkdir. Bu da bölgədə münaqişə yaradacaq məsələnin baş qaldırmasına səbəb olur. Odur ki, Tehranda keçiriləcək görüşdən də yekun nəticə gözləmək sadəlövhlük olar. İnanmıram ki, İranla danışıqlarda ciddi nailiyyət əldə olunsun.
Belə məsələlər bir qədər uzun çəkir. Xəzər dənizi isə sərvətlərlə zəngin olduğundan bütün ölkələr öz hüququnu tələb edir və dənizdəki sərvətləri əldə etməyə çalışır. Bu məsəldə cığallıq edən İran isə özünün ədalətsiz mövqeyini nümayiş etdirir. Oktyabrdakı toplantıda İranın günahı ucbatından yekun nəticə əldə edilməyəcək”.
Aysel Aslan
