Dövlət başçısı tərəfindən aparılan islahatlara dəstək baxımından ciddi müzakirələrin aparılması, aktual polemikaların təşkili, maraqlı tərəflərin iştirakı ilə diskusiyaların aparılmasına ehtiyac var
Milli İnternet Forumunun prezidenti Osman Gündüz AzTV və İTV-nin birləşdiriləcəyi ilə bağlı səslənən iddialara münasibət bildirib. Son dövrlərdə Prezident tərəfindən dövlət sektorunda optimallaşdırma və idarəetmənin təkmilləşdirilməsi, büdcə xərclərinə qənaət istiqamətində atılan addımlar baxımından bu məsələnin daha da aktuallaşmasına diqqət çəkən Forum prezidentinin qeydinə görə, teleradio fəaliyyəti və İTV ilə əlaqəli qanunvericilik aktları müzakirə olunanda bu məsələ də ciddi müzakirə predmetinə çevrilib:
"Hazırda AzTV-də islahatların, müəyyən dəyişikliklərin aparıldığı bildirilir.
Təəssüf ki, İTV hələlik gözləntiləri doğrultmayıb. İTV-nin "qızıl dövrünü” indiyədək nəinki qaytarmaq, heç yaxınlaşmaq mümkün olmayıb. Yeni rəhbərlik gələndən, Yayım Şurası yenilənəndən sonra sadəcə Xəbərlər proqramına və studiyalara bir az əl gəzdirilib, vəssalam”.
Qanunvericiliklə İTV qarşısına qoyulan vəzifələrin icrası və prinsiplərə əməl edilməsi sahəsində ciddi problemlərin aktual olaraq qaldığını vurğulayan O.Gündüz hesab edir ki, plüralizm prinsipinə əməl etmək isə ümumiyyətlə yaddan çıxıb:
"Hərdən mənə elə gəlir ki, AzTV bu baxımdan daha öndədir. Hazırda dövlət başçısı tərəfindən aparılan islahatlara dəstək baxımından ciddi müzakirələrin aparılması, aktual polemikaların təşkili, maraqlı tərəflərin iştirakı ilə diskusiyaların aparılmasına ehtiyac var. Parlamentin, vətəndaş cəmiyyətinin və biznes sektorunun bu islahatlarda iştirakı və dəstəyi ilə bağlı, verə biləcəyi töhfələrlə bağlı efirdə faydalı bir şey tapmaq çox çətindir. Təəssüf ki, bu tip müzakirələr hələlik yalnız sosial mediada aparılır. AzTV və İTV-yə dövlət büdcəsindən xeyli vəsaitlər ayrılır. Ümid edirəm ölkədə KİV siyasətini müəyyən edənlər efir məkanının canlandırılmasına, dövlət büdcəsindən maliyyələşən TV-lərdə zəruri islahatların aparılmasına ciddi diqqət yetirəcəklər”.
Şəymən
