"Azərbaycan istəsə belə, Kürdüstanda keçirilən referenduma dəstək verə bilməz”.
Bunu "Sherg.az”a daha bir məmurun Kürdüstanda keçirilən referendumu dəstəkləməsinə münasibət bildirərkən millət vəkili Tahir Kərimli deyib.
O bildirib ki, Kürdüstana dəstək verənlər separatizmə, qondarma Dağlıq Qarabağa haqq qazandırmış olur:
"Bundan başqa müxtəlif ölkələrdə milyonlarla kürdlər yaşayır. Onların separatizminə dəstək vermək çox ölkənin ərazi bütövlüyünü təhdid altına alır. Xüsusilə, Azərbaycan da çoxmillətli xalqdır və burada separatçılığa gətirib çıxara biləcək təbliğatlar suverenliyimizə zərbədir.
Dövlət strukturunda çalışan, dövlətin mənafeyinə xidmət edən şəxslər anlamalıdır ki, Azərbaycan dövlətinin siyasətinə qarşı gedə bilməz. Kimsə Azərbaycana qarşı təbliğat aparırsa, nə üçün Azərbaycan vətəndaşlığını daşıyır?
Məmur insandır, ola bilər ki, kürdlərin hüququnu müdafiə etsin. Amma bunun heyfini Azərbaycan dövlətindən almaq istəyirsə, onda hüquqi məsuliyyət daşıyır və cavab verməlidir. Dövlət orqanlarında çalışan istənilən şəxs Azərbaycanın dövlət suverenliyini qəbul etmiş, bunun müdafiəsi altında olan bütün vətəndaşlara, vətəndaşlığı olmayanlara – hamıya aiddir. Azərbaycan dövlət siyasəti odur ki, Kürdüstanda keçirilən referendumu tanımır”.
Ölkə daxilində Kürdüstan referendumuna dəstək verən hər iki məmurun işğal olunmuş rayonumuzun sakini olduğunu diqqətə çatdıran deputat deyib ki, həmin şəxslər dövlətimizin müdafiəsi üçün çalışmır:
"Ən qorxulusu odur ki, bütün dünyada Azərbaycanı sevməyən xristian təəssübkeşliyinə xidmət edən beynəlxalq təşkilatların "ağzına saqqız verirlər”. Sabah onlar süni şəkildə məsələ qaldıracaqlar ki, guya Azərbaycanda insan haqları pozulur, mövqeyinə görə başqa millətdən olan vətəndaş incidildi. Amma həmin şəxslər qanuni şəkildə cavab verməlidir.
Həmin bölgədən – Laçın, Qubadlı zonasından olan kürd qardaşlarımız Qarabağ hadisələrində ciddi şəkildə torpaqlarımızın müdafiəsi uğrunda mübarizə aparırdılar. Bəs bu məmurlara nə olub? Görünür, bunların içərisində xarici qüvvələrə çalışanlar var. MDB kürdləri də bəyan etdi ki, əksəriyyət referendumun tərəfdarıdır. Bütün referenduma dəstək verən şəxslərin bir-biri ilə əlaqələri var. Bu şəbəkə isə Ermənistanın xeyrinə olan iş görür. Bu təbliğat Azərbaycana ziyandır və vaxtında qarşısı alınmalıdır”.
Qeyd edək ki, Laçın rayon sakini, "Azəravtoyol” İstehsalar Təmir-Tikinti Birliyinin 2 saylı şöbəsində çalışan Vüqar Bəndalıoğlunun Kürdüstanda referendum keçirilməsini təbliğ etməsi bağlı məlumat yayılıb. O da İraqda keçirilən referendumu dəstəkləyib və Şimali İraq Kürd Muxtariyyətinin rəhbəri Məsud Bərzaninin fotolarını paylaşıb.
Xatırladaq ki, bir neçə gün əvvəl Laçın rayonu İcra Hakimiyyətinin hüquq şöbəsinin müdiri Fizuli Tanirverdiyev də özünün feysbuk səhifəsində İraq Kürdüstanının müstəqilliyini dəstəklədiyini bildirmişdi. Həmin məmurla bağlı müvafiq tədbirlər həyata keçirilib.
Aysel Aslan
