Dolların məzənnəsi 1,63 ötüb. Mərkəzi Bankdan (MB) verilən məlumata görə, 10.03.2016-cı il tarixinə 1 ABŞ dollarının rəsmi məzənnəsi 1,6315 səviyyəsində müəyyən olunub. Ona görə də, dolların bahalaşması fonunda bu valyutanın mart ayının sonuna qədər 2 manat olacağına dair proqnozlar verilir.
Tanınmış iqtisadçı Oqtay Haqverdiyev də "Şərq”ə açıqlamasında dolların qalxmasını təbii proses adlandırıb: "Dəfələrlə demişəm ki, manatın real qiyməti tamam başqadır. İndiyə qədər MB bu rəqəmləri tənzimləyirdi. 1 dollar bizim 78 qəpiyə bərabər idi. Neçə illərdi belə idi. Buna da Azərbaycan külli miqdarda pul xərcləyirdi. Onda neftin də qiyməti baha idi. Manatın real qiymətini yada salmırdılar. Lakin son iki devalvasiyadan və MB-nin manatı buraxmasından sonra valyutamız öz real qiymətinə gəlib çatmalıdır. Bu da uzun sürən prosesdir və bir-iki günün işi deyil. 2 il öncə demişəm ki, manatın dollarla müqayisədə real qiyməti 3-5 manat arasındadır. Yəni 1 dollar 3-5 manata bərabər olmalıdır. İndi bura gəlib çatmaq üçün müddət lazımdır. Bir-iki ilə manat öz yerini tutmalıdır. Baxın, sizə bir misal deyim. Səudiyyə Ərəbistanının valyutası olan real illərdir ki, dollardan ucuzdur. 1 dollar 1,8 reala bərabərdir. Bizdə isə 1 dollar 78 qəpiyə bərabər idi. Fikir verin, Səudiyyə Ərəbistanının iqtisadiyyatı bizdən dəfələrlə çox inkişaf edib. Onlar da bunu edə bilərdilər də. Amma etmədilər”.
Ekspertin sözlərinə görə, valyuta bazarda tələb və təklif prinsipi əsasında formalaşır: "Bazar iqtisadiyyatı bunu tələb edir. Ola bilər ki, arada dollar aşağı düşsün. Sonra yenidən qalxsın. MB manatı buraxıbsa, manat yavaş-yavaş öz qiymətinə gəlib çatacaq”.
Ayyət Əhməd
