"Azərbaycanda avtoritet yoxdur. Onlar başqa ölkələrdə fəaliyyət göstərirlər". Bunu Sherg.az-a lənkəranlı kriminal avtoritet kimi tanınan "Piter Elçin”in qohumunun qətlə yetirilməsindən danışarkən keçmiş polis rəisi Mahmud Hacıyev deyib.
O bildirib ki, mediada yayılan xəbərlərdə kriminal avtoritetin adı çəkilsə də, bu cinayətin "oğru aləmi” ilə əlaqəsi olmaya bilər:
"Əvvəl hadisənin hansı səbəbdən baş verdiyini dəqiqləşdirmək lazımdır. Qısqanclıq, tamahkarlıq, quldurluq, xuliqanlıq, adi anlaşılmazlıq və digər zəmində bu cinayət törədilə bilər. İctimaiyyətdə hadisəyə bu şəkildə don geyindirilməsi reallıqdan bir qədər uzaqdır".
Son zamanlar avtoritetlərə rəğbətin artmasına da münasibət bildirən M. Hacıyev deyib ki, xarici ölkələrdə həmin azərbaycanlı avtoritetlər, ora bir tikə çörək dalınca gedən, xırda və böyük bizneslə məşğul olan həmyerlilərimizə köməklik göstərir:
"Dünyanı yazılmış və yazılmamış qanunlar idarə edir. Yazılmamış qanunlar həmişə olub, indi də var və gələcəkdə də olacaq. Hətta elə məqamlar olur ki, o yazılmamış qanunlar daha irəlidə dayanır. Yaxınlarda ölümü səs- küy yaradan Rövşən Caniyev, sabiradabadlı Hikmət, Masallıdan Mamed kimi şəxslər yazılmış, ya da yazılmamış qanunlarla Rusiyadakı azərbaycanlılara köməklik göstərdiklərinə görə hörmətləri ölkəmizdə də yüksək idi. Onların Rusiyanın dövlət təşkilatlarından, kiçik müəssisələrdən tutmuş, kriminal aləmə qədər çox yatırımları və sıx əlaqələri var idi. Bu əlaqələr artdıqca artıq dövlətin özünün maraqlarına xidmət edir ki, bu şəxslər aradan götürülsün. Ona görə, çox zaman onların ölümünün detalları açılmır və ya başqa səbəblər gətirilərək pərdələnir. Məsələn, sabirabadlı Hikmətin ölümündə də Rusiya dövləti özü maraqlı olduğundan onun ölümü də müəmmalı baş verdi və münasibətləri yaxşı olmayan qrupların öldürdüyü deyildi”.
Qeyd edək ki, bir neçə gün əvvəl Masallı rayonunda qətl hadisəsi baş verib. Lənkəran rayon sakini Murad Quluzadə tərəfindən odlu silahla qətlə yetirilmiş Fariz İsmayılovun Rusiya vətəndaşı və lənkəranlı kriminal avtoritet "Piter Elçin”in qardaşı olduğu deyilir.
Aysel Aslan
