Dünən 23 illik tarixə malik və ölkənin ictimai-siyasi həyatında mühüm rol oynayan "Şərq” qəzeti abunə kampaniyasına başlamaq qərarı verib. Məhz bu məqsədlə qəzetin baş redaktoru Akif Aşırlı redaksiyada toplantı keçirərək, klassik qəzet ənənələrinin yaşadılması naminə "Şərq”i oxu” şüarı ilə ictimaiyyət nümayəndələrinə, sadə vətəndaşlara, qəzet oxumaq istəyən hər kəsə müraciət ünvanlayaraq, abunə yazılmaq üçün çağırış edib. Və qəzetin redaksiyasında "Abunə dəftəri” açılıb. Artıq bu çağırışdan sonra sosial mediada, eləcə də ictimaiyyətdə ziyalılar, aydınlar və oxucular "Şərq"ə dəstəklərini ifadə ediblər.
"Şərq”ə dəstək nümayiş etdirən nüfuzlu ziyalılarımızdan biri də Azərbaycanın əməkdar mədəniyyət işçisi, qocaman jurnalist Məzahir Süleymanzadədir. Tanınmış mətbuat nümayəndəsi öz "Facebook" səhifəsində "Şərq”i oxu" abunə kampaniyasına dəstək üçün bunları qeyd edib:
"Mən hələ heç bir şəklin qarşısında belə qürurla dayanmamışdım...Bu imkanı mənə neçə il qabaq "Şərq" qəzeti yaratdı. Redaksiyanı haqlı olaraq gənc jurnalistlərin yaradıcılıq meydanı sayırlar. "Şərq" təkcə qəzet deyil, yüzlərlə, minlərlə oxucunun qəlbini isitdiyi ocaqdır. Bu ocaq heç vaxt sönməyəcək. Mən də "Şərq"in abunə çağırışına qoşulur, cüzi pensiyamdan böyük məmnuniyyətlə müvafiq vəsait ayırıram. Akif Aşırlıya minnətdarlıq hissilə və səmimiyyətlə bildirirəm ki, təcrübəli mətbuat işçisi kimi "Şərq" qəzetində maaşsız işləməyə, bu gənc və peşəkar kollektivə əlimdən gələn köməyi göstərməyə hazıram”.
İsmayıl
