Tədbirə Azərbaycanın Moldovadakı səfiri Qudsi Osmanov və digər qonaqlar qatılıblar
Martın 16-da Moldovada fəaliyyət göstərən Azərbaycan diaspor təşkilatlarından ən fəalı - Moldova Azərbaycanlılar Konqresi baharın gəlişini və təbiətin oyanışını müjdələyən Novruz bayramını qeyd ediblər.
“Sherg.az” xəbər verir ki, koronavirus pandemiyası səbəbindən daha geniş tərkibdə təntənəli tədbir keçirmək mümkünsüz olduğundan mövcud qaydalar çərçivəsində sadəcə 20 nəfərin qatıldığı xudmani tədbir təşkil olunub:
“Bayram tədbirini Azərbaycan Respublikasının Moldova Respublikasındakı Fövqəladə və Səlahiyyətli Səfiri cənab Qudsi Osmanov və Moldova Respublikasındakı Qaqauz İcmasının sədri Nikolay Terzi də şərəfləndiriblər. Əvvəlcə, Moldova Azərbaycanlıları Konqresinin prezidenti Elçin Bayramov qonaqları salamlayıb. Daha sonra hörmətli səfir Qudsi Osmanov təbrik nitqi ilə çıxış edib. Həmçinin, tədbirə onlayn qaydada qoşulan Türkiyə Cümhuriyyəti Böyük Millət Məclisinin deputatı Şamil Ayrım və Azərbaycan Milli Məclisinin üzvü Sabir Rüstəmxanlının da təbrikləri dinlənilib.
Qeyd olunub ki, azsaylı qonaqların qatılımı ilə baş tutmuş bayram tədbiri səmimi ailə ortamı, ev mühiti yaradıb:
“Ümid edirik, gələn il Moldova Azərbaycanlıları Konqresi Novruz bayramını bütün diaspora nümayəndələrinin iştirakı ilə daha geniş tərkibdə, səsli-küylü və atəşfəşanlıqla qeyd edəcək. Hamını qarşıdan gələn Novruz bayramı münasibətilə hərarətlə təbrik edirik!”.
