NATO-ya üzv ölkələrin müdafiə nazirləri iki yeni komandanlığın yaradılmasına qərar veriblər. Təşkilatın baş katibi Yens Stoltenberq deyib ki, yeni komanda strukturlarının sxemi artıq razılaşdırılıb.
Onun sözlərinə görə, komandanlıqlardan biri Atlantik okeanda nəqliyyat yollarının təhlükəsizliyini, digəri isə Avropada canlı qüvvə və texnikanın hərəkətini təmin edəcək. Stoltenberq həmçinin bildirib ki, NATO nəzdində kiber əməliyyatların keçirilməsi üzrə mərkəz yaradılacaq.
Hərbi alyansın öz fəaliyyətini genişləndirməsi ilə bağlı "Şərq”ə açıqlama verən "Atlas” Araşdırmalar Mərkəzinin rəhbəri Elxan Şahinoğlu deyib ki, müxtəlif bölgələrdə yaranmış təhlükəli vəziyyət NATO-nu öz hərbi fəaliyyətini genişləndirməyə sövq edib:
"Qərb dövlətlərinin Rusiya ilə münasibətlərində ciddi gərginlik müşahidə olunur. Moskvanın hərbi potensialını artırması da ABŞ və Avropa ölkələrini narahat etməyə başlayıb. İndi baş verən proseslər soyuq müharibə illərini xatırladır. O zaman SSRİ raketlərin sayına görə Avropa ölkələrini qabaqlamağa çalışırdı. Sırf ona görə hərbi alyans öz fəaliyyətini genişləndirməyə qərar vermişdi. Bu dəfə də ona bənzər hadisələr yaşanmaqdadır.
Ümumi olaraq demək olar ki, təşkilatın yeni komandanlıqlar qurması dünyanın bir çox regionlarında mövcud olan təhdidlərlə bağlıdır. Xüsusən, terrorla mübarizə istiqamətində daha təsirli olmaq və Rusiyanın oynadığı neqativ rolu zərərsizləşdirmək üçün NATO müəyyən tədbirlər görmək məcburiyyətindədir”.
İsmayıl
