Böyük ehtimalla prezident seçkilərindən sonra Moskva Azərbaycana yeni diplomat təyin edəcək
Ötən ilin payızından etibarən Rusiyanın Azərbaycandakı fövqəladə və səlahiyyətli səfiri vəzifəsi boşdur. Keçmiş səfir Vladimir Doroxin 2017-ci ilin noyabrında postundan azad edilib. Doroxindən sonra səfir vəzifəsinə ermənipərəst mövqeli Georgi Zuyevin təyin olunacağı barədə məlumatlar yayılsa da, Bakının etirazı üzərinə Kreml bu təyinatla bağlı mövqeyindən geri çəkilib.
Doğrudur, sonradan Rusiya XİN başçısı Sergey Lavrov bildirdi ki, guya, Moskva Zuyev üçün Azərbaycandan heç vaxt aqreman xahiş eləməyib. Ancaq 2017-ci ildə Lavrovun Azərbaycanı təhdid edən açıqlamaları səfir təyinatında ermənipərəst namizədə üstünlük verilməsi ehtimalını xeyli gücləndirir.
Bəzi ekspertlər səfir təyinatının gecikməsinin Rusiya-Azərbaycan münasibətlərinə mənfi təsir göstərdiyini iddia etsələr də, əksəriyyət prosesi başqa cür şərh edirlər. Məlumat üçün deyək ki, Rusiya Xarici İşlər Nazirliyinin sözçüsü Mariya Zaxarova da səfirin olmamasının iki ölkənin əlaqələrinə təsir etmədiyini deyib. XİN rəsmisi vurğulayıb ki, səfirin dəyişdirilməsi təbii prosesdir: "Bakıdakı səfirliyimiz işləyir, Moskvadakı azərbaycanlı həmkarları ilə əlaqələrini davam etdirir. Münasibətlərdə heç bir porblem yoxdur”.
Səfir postunun boş saxlanması ilə bağlı "Şərq”ə danışan politoloq İlqar Vəlizadə deyib ki, təyinatın gecikməsi Rusiya-Azərbaycan münasibətlərinin lokal xarakter daşımadığını, tərəflərdən hansısa birinin hakim mövqedə durmadığını göstərir. Ekspertin sözlərinə görə, Rusiya və Azərbaycan bərabərhüquqlu dövlətlərdir:
"Səfir təyinatının hələ də baş tutmaması Rusiyanın Azərbaycanla hesablaşdığını göstərir. Azərbaycan öz mənafeyi naminə konkret mövqeyini ortaya qoyub. Moskva prosesə həssas yanaşdığı üçün tələsik qərar verməyə tələsmir. Hazırda tərəflər arasında məsləhətləşmələr gedir. Xatırladım ki, bu kimi hallar ABŞ-Azərbaycan münasibətlərində də yaşanıb. Vaşinqton uzun müddət Azərbaycanı səfirsiz qoydu, onların təklif etdiyi namizədə rəsmi Bakı tərəfindən aqreman verilmədi.
Bütün hallarda Azərbaycan tərəfi çalışır ki, səfirlik postunu tutan şəxs münasibətlərdə müsbət rol oynasın. Yanlış hərəkət və fəaliyyətlə əlaqələrə zərbə vuran diplomatlar təyin olunmasın. Fikrimcə, Rusiyada keçiriləcək prezident seçkisindən sonra Moskva məsələyə yenidən qayıdacaq və ölkəmizə yeni səfir təyin edəcək”.
Analitik vurğulayıb ki, səfirin olmaması ikitərəfli münasibətlərə hansısa mənfi təsir göstərmir:
"Düzdür, bəzi siyasi motivlər olmamış deyil. Ancaq müəmmalı məqamlar olmasına baxmayaraq, ikitərəfli əlaqələrdə geriləmə yoxdur.
Səfir təyin olunmuş olsaydı belə Rusiya ilə Azərbaycan arasında heç nə dəyişməyəcəkdi. Rusiya-Azərbaycan münasibətləri çoxşaxəlidir. Bir çox kanallar üzrə sıx əməkdaşlığımız mövcuddur. Səfir məsələsi o qədər də aktual deyil. Səfirin yoxluğu Rusiyanın baş nazirinin müavini Roqozinin Azərbaycana səfərinə əngəl törətmədi. Bu da onu göstərir ki, əlaqələr olduğu kimi qalmaqdadır”.
İsmayıl
