Müdafiə naziri, general-polkovnik Zakir Həsənov aprel döyüşləri ilə bağlı sensasion açıqlama verib.
General qeyd edib ki, bütün müharibələrdə satqınlardan, vətənini, millətini hansısa öz şəxsi maraqlarına satanlardan istifadə edirlər.
Nazir bildirib ki, bunun da nəticəsi olmayacaq:
"Biz satqınları üzə çıxartdıq. Satqınlar istisna olmaqla, bir nəfər əsgər, bir nəfər zabit, bir nəfər general tərəddüd etmədən döyüşə qalxdı. Hər bir əsgər əmrlə döyüşə qalxdı və hücuma keçdi. Mən özüm hücum başlayanda Lələtəpə istiqamətində idim. Komanda məntəqəm o istiqamətdə idi. Bütün bunları öz gözümlə görmüşəm. Yerimi Talış yüksəkliyi istiqamətində dəyişirdim. Yolda gördüm ki, bizim xeyli sayda cavanlarımız könüllü döyüşə gəlib. Onlara ehtiyacımız olmadı”.
Tarixən döyüşlərdə daxildə və xaricdə satqınların mövcud olduğunu vurğulayan ehtiyatda olan polkovnik Cəlil Xəlilov "Sherg.az”a bildirib ki, bütün dövlətlərdə müharibə zamanı millətinə xəyanət edənlər olur:
"Hələ 2-ci dünya müharibəsində də belə əsgərlər olub. Təbii ki, hüquq mühafizə orqanları bu cür hadisələrdən xəbərdar olmalı və ciddi tədbirlər görməlidir. Belə satqınlar çoxluq təşkil etmir. Lakin öz dövlətini, millətini, ordusunu sevən əsgərlərimiz də çoxdur. Belə igid oğullarımızın qarşısında heç kim tab gətirə bilməz. 1-2 nəfər xəyanətkar varsa, cəzalarını çəkəcəklər. Onlar Azərbaycan ordusunu heç vaxt öz yolundan döndərə bilməyəcəklər”.
Yeganə Bayramova
