8 yaşlı uşaq hovuzda boğuldu
Faciəli hadisə Antalyanın Alanya bölgəsində yaşanıb. “Şərq” “Milliyyət.com”a istinadən bildirir ki, Gülər ailəsi Adanadan Alanyaya istirahətə gəlib. “5 ulduzlu” otelə ödəniş edən ailənin üzvü, 8 yaşlı Əli Kamal Gülər anası və əmisi ilə otelin hovuzunda sərinlənmək istəyib. Hovuzda bir qədər qaldıqdan sonra uşağın əmisi Okan Gülər telefonuna enerji yükləmək üçün hovuzdan çıxıb, Əli Kamalı isə anası Ayşəgül Gülərə tapşırıb. Əmi hovuza döndüyündə Əli Kamalı suyun üzərində cansız halda görüb. Əli Kamal hovuzdan çıxarılıb, tibbi yardım çağırılıb, lakin həkimlər nə qədər çalışsa da, uşağı həyata qaytara bilməyiblər. Əli Kamalın cənazəsi tibbi rəy üçün Antalya Ədli Tibb Qurumuna aparılıb. Polis hadisə ilə bağlı istintaqa başlayıb. Otelin 3 əməkdaşı nəzarət altına alınıb. Onların Əli Kamal hovuzda boğularkən vəzifə başında olmadıqları müəyyənləşib.
