A.Rəşidoğlu bildirib ki, Paşinyan Qarabağ danışıqları ilə bağlı cəmiyyətə mesaj verməlidir: "Baş nazir Qarabağın danışıqlarda tərəf kimi iştirakını istəyir. Əks halda ATƏT-in Minsk Qrupunun vasitəçiliyindən imtina edəcəyi ilə bizi hədələyir. Sual yaranır: - Paşinyan hansı addımları ata bilər? İrəvan qondarma "Dağlıq Qarabağ Respublikası”nın "müstəqilliyini” tanıya bilər. Ancaq Paşinyan nəzərə almalıdr ki, Minsk Qrupu çərçivəsində aparılan danışıqlardan çıxan tərəf məğlub olacaq. Ermənistan bu formatdan çıxmaq istəyirsə, onun bir yolu qalır, o yol da Azərbaycanla razılıq əldə etməkdir. Bir sözlə, Ermənistanın Qarabağla birgə Qərbə inteqrasiyası mümkün deyil. Rusiyanın da münasibəti fərqlidir. Paşinyan iki od arasında qalıb. Rusiya ilə münasibətlər və Qərbyönlü siyasətin həyata keçirilməsi tələbləri ciddi sıxıntıya çevrilməkdədir”.
Siyasi şərhçi bəyan edib ki, Paşinyan millət vəkili olarkən Rusiyanı tənqid edən siyasətçi kimi tanınıb. O, Serj Sarkisyandan Rusiyadan uzaqlaşmağı və Qərbə üz tutmağı tələb edən şəxs olub:
"Baş nazir Paşinyan Rusiyanın təsirindən çıxmağı düşünsə də, bunun mümkünsüz olduğunu başa düşür və çıxış yolu axtarır. Bu baxımdan, İrəvanın Qarabağ danışıqlarında güzəştə getmək niyyəti müşahidə edilir. Əlavə etmək lazımdır ki, Nikol Paşinyan mitinqlər zamanı verdiyi vədlərə əməl edə bilmir və xilas kəməri kimi Azərbaycanın dövlət başçısı ilə növbəti dəfə görüşməyə can atır. Onun bir qədər əvvəl səsləndirdiyi "danışıqlarda biz yox, Qarabağ iştirak etməlidir” şüarı artıq mənasızlaşıb. Bunu Paşinyan da dərk edir və anlayır ki, Ermənistan ilə Azərbaycan arasında qüvvələr nisbəti birmənalı olaraq Bakının xeyrinədir. İrəvan istəsə belə müharibə variantını ağlından keçirə bilməz. "Nə hərb, nə sülh” vəziyyəti də uzun müddət davam edə bilməz. İşğala son qoyulmadıqca vəziyyət gərgin olaraq qalacaq. Cəbhədə toqquşmalar və erməni təxribatı davam edərsə, Bakının "aprel əməliyyatı”nı təkrarlamaqdan başqa yolu qalmayacaq. Əgər savaş başlayarsa, Paşinyan öz diletant bəyanatları ilə uzun müddət tab gətirə bilməyəcək. Bu baxımdan, onun üçün yeganə yol Bakının və vasitəçilərin şərtlərini qəbul etməkdən keçir”.
Qeyd edək ki, Azərbaycanın xarici işlər naziri Elmar Məmmədyarov Şərq Tərəfdaşlığı ölkələrinin XİN rəhbərlərinin görüşündə iştirak edib. Dağlıq Qarabağ münaqişəsinin həlli prosesinə diqqət çəkən nazir problemin çözülməsinin bölgənin dayanıqlı inkişafı üçün ən vacib məsələ olduğunu söyləyib. XİN rəhbəri vurğulayıb ki, erməni həmkarı ilə keçirdiyim iki görüş, Prezident İlham Əliyevlə Ermənistanın baş naziri Nikol Paşinyan arasında baş tutmuş söhbət irəli getmək üçün müsbət impuls verir: "Ermənistanda qarşıdan gələn seçkilərdən sonra bu ölkənin sülh və sabitliyə nə dərəcədə hazır olduğu daha aydın olacaq. Bu isə Ermənistanın öz qoşunlarını Azərbaycan torpaqlarından çıxarması deməkdir. Rəsmi Bakı substantiv, nəticəyə yönəlik danışıqlara hazırdır və bunu hər dəfə gündəmə gətirir”. İsmayıl
