"Biz dövlət başçımıza hər zaman inanmışıq, inanırıq da”.
Bunu Sherg.az-a prezident İlham Əliyevin Cocuq Mərcanlı kəndində qətiyyətlə səsləndirdiyi: "Biz işğal altındakı torpaqlara qayıdacağıq” açıqlamasına münasibət bildirərkən millət vəkili Elman Məmmədov deyib.
O bildirib ki, ölkə başçısının rəhbərliyi ilə onun apardığı uğurlu siyasətin nəticəsində biz doğma yurd-yuvalarımıza qayıdacağıq:
"Cənab prezident 2003-cü ildən bu günə qədər cəmiyyətin, Azərbaycanın həyatında nəyi söz veribsə, hamısını uğurla yerinə yetirdi. Ölkə başçısının bu arzusu da çin olacaq. Çünki onun apardığı xarici və daxili siyasət beynəlxalq aləmdə dövlətimizin nüfuzunun güclənməsinə, hörmətinin artmasına gətirib çıxarıb. Azərbaycanın bütün sahələrdə inkişafı durmadan davam edir. Bunların nəticəsində Azərbaycan bu gün dünyada nüfuz sahibidir, regionun lider dövlətidir.
Ordumuz da regionun ən güclü ordusu hesab olunur. Azərbaycan ordusu təkcə düşmən Ermənistana qarşı deyil, dövlətimizə yönələ biləcək istənilən hücumu dəf etməyə qadir silahlı birləşmədir. Ordumuzun gücü. apardığımız siyasətin uğuru nəticəsində Cocuq Mərcanlıların sayı çoxalacaq. Bütün işğal altındakı ərazilərimiz azad olunacaq. Biz prezidentimizə inanırıq. Bu deyilənlər həqiqət olacaq və üçrəngli bayrağımız işğaldan azad olunmuş hər bölgədə dalğalanacaq”.
Qeyd edək ki, Cəbrayıl rayonunun Cocuq Mərcanlı kəndinin bərpası artıq başa çatıb. İyunun 14-də isə Azərbaycan Prezidenti İlham Əliyev yenidən qurulan Cocuq Mərcanlı kəndində görülən işlərlə tanış olub, sakinlərlə görüşüb.
Aysel Aslan
