Parlamentin Elm və təhsil komitəsinin sədr müavini Bəxtiyar Əliyev laboratoriyalarda ən sadə cihazların belə olmadığı barədə iradlarını bildirib.
Onun sözlərinə görə, istər bakalavr, istər magistratura pilləsində bir çox laboratoriyalarda sadə cihazlar yoxdur ki, orada gələcək mütəxəssislər müəyyən araşdırmalar aparsınlar, yaxud ən azından, heç olmasa, yeni biliklərə yiyələnmək üçün o cihazlarla işləməyi bacarsınlar. Sədr müavini belə məsələlərin müzakirə edilməsinin vacib olduğunu da diqqətə çatdırıb.
B.Əliyevin fikirləri ilə bağlı "Şərq”ə danışan tibb elmləri doktoru, professor Adil Qeybulla bildirib ki, son illər dövlət nəzarətində olan tibb müəssisələrinin maddi-texniki bazasının möhkəmləndirilməsi istiqamətində xeyli işlər görülüb. Müasir diaqnostik aparatlar, laboratoriya ləvazimatı alınıb:
"Amma bir şey var ki, laboratoriyada cihazlardan daha çox sərfiyyat materialları, yəni reaktivlər və s. yoxdur. Çünki laboratoriyalar bir dəfə təmir olunub, vəsait qoyulub, lakin bunların yüksək keyfiyyətlə işləməsi üçün reaktivlər, sərfiyyat materialları alınmalıdır. Bunlar isə əlavə xərclər deməkdir. Bəli, bu gün dövlət xəstəxanalarında, hətta bəzi özəl xəstəxanalarda da alınmış cihazların işləməməsi ucbatından, yəni həmin laboratoriyanın vətəndaşın xeyrinə adekvat çalışması faktları yetərincədir. Bu tənqid özbaşına deyil.
Düşünürəm ki, bu da müalicənin keyfiyyətinə təsir edir, bəzi mühüm müalicə üsullarına lazım olan laborator nəticələri əldə etmək mümkün olmur. Əlbəttə, bütün dünyada protokollar var. İstənilən bir xəstəliyin müalicəsi, cərrahiyəsi zamanı konkret müayinə olunacaq laborator analizlər var ki, bunlar mütləq həll olunmalıdır. Amma bizdə bununla bağlı problemlər get-gedə dərinləşir”.
Yeganə Bayramova
