"Ümumi təhsil müəssisələrinə müəllimlərin işə qəbulu üzrə müraciətlərin rekord dərəcədə çox olması müəllimlik peşəsinə marağın artdığını sübut edir. Bu, sevindirici haldır”.
Bunu "Sherg.az”a 50 min 697 nəfər müəllim olmaq istəyən şəxsin MİQ.EDU.AZ saytında qeydiyyatdan keçməsindən danışarkən tanınmış təhsil eksperti, professor Şahlar Əsgərov söyləyib.
O bildirib ki, Təhsil Nazirliyi, dövlət strukturları tərəfindən həyata keçirilən layihələr müsbət nəticəsini göstərdi:
"Bildiyimiz kimi, müəllimlik ixtisasına marağın artırılması üçün müəyyən təşviqedici proqramlar həyata keçirildi. Abituriyentləri, xüsusilə, qəbul imtahanlarında yüksək bal toplayanları bu ixtisasa yönləndirmək üçün dəstək layihələri aparıldı. Dövlət tərəfindən atılan bütün bu addımların nəticəsi olaraq, müəllimliyə verilən dəyər yüksəldi və maraq get-gedə artdı”.
Rekord nəticələrin bu sahəyə göstərəcəyi təsirlərə gəlincə, Ş.Əsgərov çoxsaylı müraciətlərin rəqabət mühitini yaxşılaşdıracağını düşünür:
"Təbii ki, imtahanlar nəticəsində müəllim olmaq istəyən məzunlardan ən yaxşıları seçilib, işlə təmin olunacaq. Bu prosesin şəffaf həyata keçirildiyi hər kəsə məlumdur. Yaxşı namizədlər arasında ən yaxşıları seçilib, müəllim adına layiq görüləcək”.
Qeyd edək ki, Təhsil Nazirliyi sisteminə daxil olan ümumi təhsil müəssisələrinə müəllimlərin işə qəbulu üzrə elektron sənəd qəbulu iyulun 8-də yekunlaşıb.
Aysel Aslan
