"Rusiya hakimiyyəti ölkədəki aksiyalardan qorxub”.
Bunu Sherg.az-a Rusiya prezidenti Vladimir Putinin ölkəsindəki kütləvi etirazları "Ərəb baharı”na bənzətməsinə münasibət bildirərkən politoloq Elxan Şahinoğlu deyib. O bildirib ki, bu etirazlar həm Rusiya, həm də dünya üçün gözlənilməz oldu:
"Bir anın içərisində Moskva, Sankt-Peterburq kimi böyük şəhərlərdə minlərlə insan küçəyə axışdı. Xüsusilə, sistemdən kənar müxalifət lideri Aleksandr Navalnıy sosial şəbəkələrdə korrupsiya ilə mübarizə məqsədilə küçələrə axışmağa dəvət edir. Bundan sonra minlərlə insan onun çağırışına səs verib. Moskvada bu qədər böyük kütlənin küçəyə çıxacağını heç kim gözləmirdi. Etiraz edənlərin sayının çox olduğunu gördükdən sonra hakimiyyət polisin sayını da artırdı. Bu gün Rusiya parlamentindəki müxalifət faktiki hakimiyyətin daxili və xarici siyasətini bölüşür. Sistemdən kənar müxalifət isə Putini daha çox qorxudur. Çünki onların sayı az olsa da, Rusiyada iqtisadi vəziyyətin gərginləşməsi şəraitində etirazların miqyası, küçəyə çıxanların sayı arta bilər. Ona görə dövlət başçısı açıqlamasında bunu "Ərəb baharı”na bənzədib. Müəyyən qədər haqlıdır. Çünki Rusiyada vəziyyət dəyişməsə, korrupsiyaya qarşı mübarizə tədbirləri aparılmasa, iqtisadi vəziyyət normallaşmasa orta sinif getdikcə indiki vəziyyətdən daha da narazı qalacaq. Düzdür, bu, o demək deyil ki, Rusiyada inqilab etmək, prezidenti ya da Dmitri Medvedyevi devirmək olar. V. Putinin reytinqi hələ də çox yüksəkdir. Amma diqqət etsək görərik ki, mitinqə çıxanlar V. Putindən çox D. Medvedyevin adını çəkirdilər ki, o, islahatlar apara bilmir, korrupsiyaya bulaşıb. Bu şüarlar artıq Rusiya siyasi dairələrində, parlamentdə ciddi müzakirə olunur. Küçələrə çıxanları tənqid etsələr də, rusların etirazları Rusiya hakimiyyətini ciddi narahat edir”.
Qeyd edək ki, Vladimir Putin korrupsiya ilə mübarizə məsələlərinin ictimaiyyətin diqqət mərkəzində olmasını dəstəklədiyini söyləyib. Prezident hansısa siyasi hədəflər seçkilər ərəfəsində bundan siyasi səhnədə tanınmaq üçün istifadə edilməsini yalnış hesab etdiyini vurğulayıb: "Bu "ərəb baharı"nı xatırladır: biz bunun nəyə gətirib çıxardığını çox yaxşı bilirik. Ukraynada dövlət çevrilişinə də bu səbəb olmuşdu”.
Ayyət Əhməd
