Nəsiman Yaqublu deyir ki, səfirliyimiz bu işlə məşğul olmalıdır
Türkiyədə yaşayan azərbaycanlı jurnalist Könül Şamilqızı Azərbaycan Xalq Cümhuriyyətinin banisi Məhəmməd Əmin Rəsulzadənin həyat yoldaşı Leyla (Vanda) Rəsulzadənin məzarını tapması ilə bağlı məlumat yayıb. Bildirib ki, Esra məzarlığında Leyla Rəsulzadənin qəbrinin yerini bildirən qeydlər tapılıb.
Tarixçi-alim Nəsiman Yaqublu isə Vanda Rəsulzadənin 1974-cü ildə dünyasını dəyişdiyini və onun Türkiyədə Əsri məzarlığının xristian bölməsində dəfn edildiyini deyib: "Sonradan həmin məzarlıq ləğv edilib. Ona görə də tək Leyla xanım deyil, digər xristianlara aid məzarların kimə məxsusluğu artıq bilinmir. Həmin məzar artıq yoxdur.
Məlumatım bu qədərdir. Qəbrin həqiqətən Vanda xanıma aid olması ilə bağlı səfirlik, aidiyyəti qurumlar məşğul olmalıdır. Azərbaycan Cümhuriyyətinin 100 illiyində bununla bağlı araşdırma aparmaq olar”.
Məhəmməd Əmin Rəsulzadənin nəvəsi Rəis Rəsulzadə isə "Şərq”ə açıqlamasında məsələ ilə bağlı bir o qədər də məlumatlı olmadığını deyib. "Yayılan məlumatları mən də oxudum, amma qəbirlə əlaqəli məndə məlumat yoxdur.
Düzdür, Rəsulzadə Vanda xanıma Leyla deyə müraciət edərdi. Həmin məzar ona aid ola bilər. Belə məlumat varsa, bunu öyrənmək və yerində araşdırmaq maraqlı olar. Hər halda özüm gedən kimi bu məsələ ilə yaxından maraqlanacam”.
Şəymən
