"Tərəflər atəşkəsin pozulmasını, regionda savaşın başlanmasını istəmirlər”.
Bunu "Sherg.az”a Rusiya xarici işlər naziri Sergey Lavrovun Dağlıq Qarabağ münaqişəsi haqqında açıqlamalarını şərh edərkən Ümid Partiyasının sədri, sabiq millət vəkili İqbal Ağazadə söyləyib.
Təşkilat sədrinin fikrincə, həmsədrlər buna görə, səfərlər həyata keçirir, tərəfləri danışıqlar masası ətrafında birləşdirirlər:
"Amma hər kəsə bəllidir ki, Ermənistan-Azərbaycan Dağlıq Qarabağ münaqişəsinin həlli qlobal proseslərdən asılıdır. Rusiya heç vaxt imkan verməyəcək ki, ətrafındakı postsovet ölkələri etnik konfliktlərdən uzaqlaşıb, Qərbə inteqrasiya etsin və demokratik proses bərqərar olunsun. Biz 1992-1993-cü illərdə daha çox Qərbə inteqrasiya və demokratik cəmiyyət quruculuğu istəyirdik. Ona görə, torpaqlarımızı işğal etdilər. 20 il sonra Ukrayna həmin siyasəti - Qərbə, Avropa Birliyinə inteqrasiyanı üstün tutdu, dərhal Krımı işğal etdilər. Donbas və Donetskdə vətəndaş müharibəsi, qarşıdurma yaradıldı. Rusiya öz maraqları naminə prosesləri bu cür saxlayır, konfliktləri həll etmək istəmir. Çünki münaqişələr həll olunsa, proses Rusiyanın içərisinə keçəcək, bununla federasiya itirəcək”.
Münaqişənin həllinin qlobal proseslərdən asılı olduğunu iddia edən təşkilat sədri bəyan edib ki, Rusiya yeni mərhələyə qədəm qoymalıdır:
"Necə ki, SSRİ yeni mərhələyə qədəm qoyduqda belə konfliktlər ortaya çıxdı, Rusiya da dəyişməli, super güc anlayışından imtina etməlidir. Beləliklə Rusiya daxilində gedəcək demokratikləşmə prosesi postsovet ölkələrinin Rusiya ətrafından qaçma meyllərini gücləndirəcək. Onda bu tipli problemlər həll olunacaq. Rusiya artıq danışıqlarda hegemon olmayacaq və konfliktlərin həllində mövqe ortaya qoya bilməyəcək.
Azərbaycan tərəfi dəfələrlə bildirib ki, danışıqlar naminə danışıqlara getmək istəmir. Bu isə heç nəyi dəyişmir. Azərbaycan Dağlıq Qarabağ münaqişəsində status-kvonu dəyişmək gücündə deyil”.
Qeyd edək ki, Rusiya xarici işlər naziri Sergey Lavrov Ermənistan xarici işlər naziri Edvard Nalbandyanla görüşdən sonra mətbuat konfransı keçirib. Nazir konfransda bildirib ki, danışıqlarla bağlı təcrübə onların tezliklə başa çatmayacağını göstərir”.
Aysel Aslan
