"Rusiyada Ümumrusiya Azərbaycan Konqresinin (ÜAK) yerinə yeni struktur yaradılması ümidverici haldır”.
Bu barədə "Sherg.az”a Rusiyada yeni Azərbaycan diasporasının yaradılmasına münasibət bildirərkən politoloq İlqar Vəlizadə bildirib.
O vurğulayıb ki, yalnız həmin təşkilat işə başladıqdan sonra onun fəaliyyətini dəyərləndirə bilərik:
"Təşkilatın qarşısında mühüm vəzifələr durur. Rusiyadakı diaspora təşkilatlarının işinə yeni təkan verilməsini ümid edirik. Çünki həmin ölkədəki diaspora təşkilatlarının işini qənaətbəxş saymaq olmaz. Onların arasında subyektiv çəkişmələr olması barədə məlumatlar yayılırdı. Bu da diasporanın işinin təşkil olunmasında çətinlik yaradır. Həmin təşkilatlar qonşu ölkədə yaşayan həmvətənlərimizin hüquqlarını müdafiə etməkdə aciz olurlar. Bu problemlər aradan qaldırmaq üçün yeni yaradılan təşkilatdan gözləntilər böyükdür.
Bu təşkilat Rusiya rəsmi orqanları ilə konstruktiv münasibətlər qurmalıdır. Nəticədə azərbaycanlıların mövqeyi möhkəmlənir. Erməni diasporalarının Rusiya vilayətlərinin rəsmi orqanları ilə çox sıx əlaqələri var. Bu da onların bölgələrdə işləməsinə kömək olur. Bizim diaspora təşkilatları da əməli işlərlə məşğul olmalıdırlar. Müxtəlif subyektiv məsələlərə zaman ayırmamaq lazımdır. Yeni yaradılan təşkilat əvvəlki diaspora qurumlarının səhvlərini təkrarlamadan konkret addımlar atmalıdır”.
Qeyd edək ki, ÜAK-ın Rusiya paytaxtı üzrə icraçı direktoru, Azərbaycan mədəniyyətinin dirçəlişi və inkişafı fondunun direktoru Şamil Tağıyev Rusiya Federasiyasında bu yaxınlarda ləğv edilmiş ÜAK-ın yerinə yeni struktur yaradılacağını bildirib. Ş.Tağıyev Rusiyanın regionlarından olan Azərbaycan icmaları rəhbərlərinin Ümumrusiya Azərbaycan Konqresinin prezidenti akademik Fazil Qurbanova məktub ünvanladıqlarını və ona yeni yaranacaq təşkilata rəhbərlik etməyi təklif etdiklərini təsdiqləyib.
Aysel Aslan
