İyunun 1-dən etibarən ölkəmizə Rusiyadan ət, süd və bal istehsalı məhsulları ixrac ediləcək. Bununla bağlı Rusiyanın kənd təsərrüfatı məhsullarına nəzarət idarəsi ("Rosselxoznadzor”) və Azərbaycan Kənd Təsərrüfatı Nazirliyi arasında razılıq əldə olunub və baytarlıq sertifikatı imzalanıb.
Sənədə əsasən, Rusiya Azərbaycana mal, qoyun, keçi, donuz və quş əti, kolbasa, ət konservi, süd və süd məhsulları, təbii bal və digər arıçılıq məhsulları ixrac edəcək.
Maraqlıdır, ölkəmizə Rusiyadan ətin idxal edilməsi qiymətlərdə hansısa dəyişikliyə səbəb olacaqmı?
Rusiya ilə sərbəst ticarət əlaqələrimizin olduğunu deyən Kənd Təsərrüfatı Nazirliyi Heyvandarlığın İnkişafı şöbəsinin müdiri Qalib Əbdüləliyevin sözlərinə görə, Rusiyadan məhsulların idxal olunması sırf sertifikatların qarşılıqlı tanınma prosesidir.
İqtisadçı-ekspert Natiq Cəfərli isə bildirib ki, keçən ilin müvafiq dövrünə nisbətən ölkəmizə ət idxalı nəzərəçarpacaq dərəcədə artıb. Amma bu artım təəssüf ki, qiymətlərdə özünü ciddi şəkildə büruzə vermir, əksinə, ilin əvvəlindən qiymətlərdə bahalaşma güclənib.
İqtisadçının sözlərinə görə, idxal artdıqca, ölkəyə daha çox məhsullar gətirilsə və kənd təsərrüfatı məhsullarının ölkəyə idxalında maneələr azalsa, qiymətlərə müsbət təsir edə bilər:
"Lakin burda bir neçə önəmli məsələlər də var. Qiymətlər rus rublunun dollara və manatın dollara olan nisbətdə məzənnəsindən də asılı olacaq. Hələlik hər iki ölkədə məzənnə stabildir. 55-56 rubl 1 dollar ətrafında sabitləşib, Azərbaycanda da rəsmi məzənnə artıq bir neçə həftədir ki, 1.70 manat -1 dollar ətrafında sabitləşib. Əgər bu məzənnələrdə dəyişiklik olmasa və idxalda artım baş versə, qiymətlərə müsbət təsiri olacaq.
Yox əgər Rusiyada rubl-dollar münasibətlərində dəyişiklik olsa və yaxud da Azərbaycanda manatın dəyərdən düşməsi baş versə, təəssüf ki, bu zaman qiymətlərdə ucuzlaşmanın olacağını söyləmək mümkün deyil. Çünki Rusiyadan, ümumiyyətlə, xaricdən alınan məhsullar əsasən dollarla alınır və məzənnədə dəyişiklik baş verəcəksə, bu, qiymətlərdə öz əksini tapacaq. Amma ən azından bir müddət məzənnənin sabit olacağını düşünürəm”.
Yeganə Bayramova
