"Qanunsuz silah satışı ilə məşğul olan çox az insan var. Onları da hüquq-mühafizə orqanları saxlayır”.
Bunu "Sherg.az”a odlu silah-sursatın qanunsuz alqı-satqısı ilə məşğul olan şəxslərin zərərsizləşdirilməsindən danışarkən sabiq polis rəisi Mahmud Hacıyev deyib.
O bildirib ki, belə cinayətlər kütləvi xarakter daşımır:
"Azərbaycan uzun müddət müharibə şəraitində olub. Rus qoşunları Azərbaycanı tərk etdikdə silah-sursatları qanuni şəkildə təhvil vermədilər. Məqsədli şəkildə atıb, getdilər. Həmin silahlar da ayrı-ayrı şəxslərin əlinə silah keçdi.
Müharibə dövründən sonra sərhəd bölgəsində yaşayan insanların əksəriyyəti silah əldə etdi. Azərbaycan da Qafqaz əhlidir, silaha meyllilik var. İnsanlar əldə etdiyi sursatı evində saxlamağa çalışır. Yəqin, sonradan maddi ehtiyac olanda satırlar. Silah satan şəxslərin tutulması da bununla əlaqədardır.
Düşünmürəm ki, kimsə xaricdən silah gətirib Azərbaycanda satsın. Həmin şəxslər istəsə elə götürdükləri ölkədə bunu sata bilər. Sərhəddən keçirib, ölkəmizə gətirməyə ehtiyac qalmaz.
Ara-sıra silah satması kütləvilik, yaxud hansısa təhlükə yarada bilməz. Buna böyük rezonans verib, təhlükə mənbəyi hesab etməyin mənası yoxdur”.
Qeyd edək ki, Baş Mütəşəkkil Cinayətkarlıqla Mübarizə İdarəsi və Zəngilan Rayon Polis Şöbəsinə (RPŞ) Rəşad adlı şəxsin odlu silah satmaq istəməsi barədə əməliyyat məlumatı daxil olub.
Həyata keçirilən birgə əməliyyat-axtarış tədbirləri nəticəsində o, "Naqan” tipli tapançanı 2000 manata satan zaman polislər tərəfindən saxlanılıb.
Aysel Aslan
